Шымкентте автобус құрастыратын зауыт іске қосылады

Шымкентте автобус құрастыратын зауыт іске қосылады, деп хабарлады «ҚазАқпарат». Қала басшылығы дайын машиналарды сырттан әкелгенше, қоғамдық көлік бөлшектерін құрастырамыз деген шешімге келді. Бұл дәл сол зауытта құрастырылған жеңіл автокөліктерді 30%-ға төмен бағада сатып алуға және автобустардың істен шыққан бөлшектерін оңай алмастыруға мүмкіндік береді. Зауыттың басты серіктесі – «Мерседес» неміс автокомпаниясы. Зауыт жылына 100-150 автобус шығаруды жоспарлап отыр. Әзірге кәсіпорынға 1 млн доллар қаржы құйылған. Келесі жылы зауыт басшылығы сервистік орталық құрмақшы. Бұл кәсіпорын 100 адамнан жоғары адамды жұмыспен қамтамасыз ете алады. Алайда, зауыт қазір қалалық әкімдіктің қолдауы мен ынтымақтастығына зәру. Сонымен қатар, мүгедектерге арналған еуропалық үлгідегі арнайы автобустар да жасалынады. «Қазір бізге «Мерседес» компаниясының өкілі келіп, келіссөздер жүргізіп жатырмыз. Олар бізбен бірге жұмыс жасауға дайын екендерін айтты. Автобустар экологиялық нормаларға сай болады. Қазір автобустардың үлгілері таңдалуда, бекітілгенін күтудеміз», – деп түсіндірді «Казбельтехника» сауда үйінің бас директоры Бақыт Жасұзақов.