Елбасы жылу оқшаулағыш қоспалар зауытын іске қосты

Бүгін жалпыұлттық телекөпір барысында Елбасы Нұрсұлтан Назарбаев Астанада жылу оқшаулағыш қоспалар шығаратын зауытты іске қосты. Оның өнімі Орталық Азия нарығына шығарылады деп жоспарлануда. «Құрметті Президент мырза! Польшаның Селена компаниясының бүкіл әлемде, оның ішінде Еуропа, Оңтүстік Америка және Азияда 15 өндірістік кәсіпорны бар. Бүгін біз Астанадағы зауыт олардың қатарындағы ең заманауи екендігін айрықша мақтанышпен айтамыз. Біздің өніміміз - үйлердің жылуын оқшаулауға арналған заманауи қоспалар. Өнімнің 40 пайызы Орталық Азия мен Ресейге экспортқа шығарылатын болады», - деді Селена Тобының президенті Кшиштоф Домарецки. Бұл өндірісте қызмет ететін 70 адамның басым бөлігі Польшада оқып келді. «Ағымдағы жылы мен Польшаға сапар жасадым. Біздің келіссөздерімізде ынтымақтастығымызды одан ары дамыту мәселелері көтерілді. Бұл өте жақсы үлгі боларлық жайт. Біздің Үкіметіміз бен жергілікті атқарушы органдарымыз бизнестеріңізге, құрылыс жұмыстарыңызға көмек көрсетуде», - деді Елбасы. Суретті түсірген Ерлан ОМАРОВ, "Егемен Қазақстан".