«Барыс» «Автомобилист» командасын жеңді

Құрлықтық хоккей лигасының тұрақты чемпионатында Астананың «Барысы» Екатеринбургте жергілікті «Автомобилист» командасымен кездесіп, 4:3 есебімен жеңіске жетті. Жанкүйерлер тартысты бәсекенің куәсі болды. Кездесудің 6-минутында «Барыс» сапынан Иван Кучин есеп ашса, 12-минутта Роман Старченко есепті еселеді. Матчтың екінші кезеңінде барлығы төрт шайба соғылды. 24-минутта айдын иелерінен Артем Гареев есеп айырмасын қысқартқанмен, елордалықтар 28-минутта екі шайба айырмасымен қайтадан алға шықты. Бұл жолы Кори Тривино нәтижелі соққының авторы атанды. Астаналықтардың ойыншы басымдығына ие болғанын айта кеткен жөн. Айдын иелері намысқа тырысып, 30-минутта Алексей Симаковтың көмегімен екінші шайбаларын соқты. Ал 36-минутта Константин Пушкаревтің соққысы көздеген жерінен дәл табылып, «Барыстың» соңғы әрі жеңісті голын соқты. Үшінші кезеңде «Автомобилист» хоккейшілері тағы бір мәрте шайба соқты. Ойыншы басымдығын пайдаланып, 43-минутта Артем Гареев мергендігімен көзге түсті. Алайда, бұдан кейін қанша тырысқанмен, таблодағы есеп төрешінің ысқырығы естілгенге дейін өзгеріссіз қалды. Осылайша, елордалықтар маусымдағы 17 жеңісіне қол жеткізді. Эдуард Занковецтің шәкірттері 50 ұпаймен «Шығыс» конференциясында 10-орында келеді. Келесі кездесуін 9 желтоқсан күні «Югра» командасымен өткізеді.