Астана жылу беру маусымына дайын

Кеше Астана қаласының әкімі Иманғали Тасма­ғам­бе­товтің төрағалығымен елор­да­ның 2011-2012 жылғы қыс­қы жылу беру маусымына дайындық мәселесін пысық­та­ған жиналыс болып өтті. Онда қала әкімінің орын­ба­са­ры – 2011-2012 жылғы жылу беру маусымына дайындық жөніндегі қалалық штабтың төрағасы Василий Крылов, қаланың Алматы, Сарыарқа және Есіл аудандарының әкім­дері Сапар Ахметов, Сә­била Мұстафина және Қайрат Жаңабергенов есеп берді. 2011 жылғы 20 қыркүйектегі жағдай бойынша, қаладағы бар­лық тұрғын үй қоры, яғни 1903 тұр­ғын үй түгелдей жылу мау­сымына дайын. Сонымен бірге, биыл алғаш рет қаладағы 115 білім беру нысаны, 26 денсаулық сақтау және 12 мәдениет мекемелері жылу маусымына 100 пайыз дайындықпен келіп отыр. Аста­на­ны жылумен қамтамасыз ететін басты кешен – «Астана-Энер­гия» АҚ жылу беру маусымына 96 пайыз дайын. Өткен жылғы жылу маусымы аяқталғаннан бер­гі уақытта қаланың комму­нал­дық жүйелерін, жылу беру орта­лықтары мен желілерін алдағы маусымға дайындау мақсатында ауқымды жұмыстар атқарылған. №1 ЖЭО-ның №1, 2 стан­са­лар­дың бу қазандықтарына және №4, 6 стансалардың су ысытатын қазандықтарына кең көлемде ағым­дағы жөндеу жұмыстары жүр­гізілсе, №7 стансаның су ысы­татын қазандығы күрделі жөн­деуден өткізілген. №2 ЖЭО-ның №2 стансасының турбо-ге­не­рато­рына жөндеу жасалса, №3 стан­саның бу қазандары агре­гат­тарына күрделі жөндеу жүр­гі­зілуде. «Астана-Теплотранзит» АҚ ағымдағы жылы жылу энергия­сын жіберудің қуатын 3 656,2 мың Гкал-дан 3 692,1 мың Гкал-ға дейін арттырған. Яғни, қалаға биыл былтырғыға қарағанда, 35,9 мың Гкал жылу артық беріледі деген сөз. Кәсіпорын жылу желілері жүйесін 27,97 шақырымға ұлғайтты. Жылумен қамтамасыз ететін 10 сорғы стансасы алдағы маусымға дайын. Кәсіпорын би­ыл­ғы жылы 1489 метр магис­трал­дық жылу жүйесін, 2997 метр тарату желілерін жөндеуден өткізіп, 2 334 шаршы метр жылу магистралдарына жылу қорғағыштар орнатты. «Астана-РЭК» АҚ электр қуа­тын тарататын қосалқы стан­са­ларды, тарату желілерін, кабель жүйелерін толық жөндеуден өт­кіз­ді. «Астана Су Арнасы» МКК қарамағында 817 шақырым су құбырлары желісі,  үшінші дәре­же­лі көтеру қуаты бар 9 сорғы стансасы, 87 көп қабатты тұрғын үйлерге қысыммен су жіберетін стансаларды 100 пайыз алдағы мау­сымға дайындық сапына қой­ған. «Астана қаласын сумен жаб­дық­тау және кәріз жүйесін жетілдіру жөніндегі» жапондық жоба­ны іске асыру шеңберінде бір­қа­тар жаңа нысандар іске қосылды. Атап айтқанда, алдағы жылу мау­сымында тәулігіне 210 мың текше метр су өндіретін тұтқыш және қуаты тәулігіне 105 мың текше метр су айдайтын сорғыш-сүзгі станса іске қосылды. Астана су қоймасынан су тарататын магистралдың екінші желісі қайта құрудан өткізілді. Диаметрі 1000 мм. болатын 51 шақырым су тарату құбырлары орнатылды. «АстанаГазҚызмет» ЖШС қа­ла­дағы сұйытылған газ сақтай­тын 1400 жерасты резервуарлары бар 360 ірі газ қоймалары қон­дырғыларына қызмет көрсетеді. Ол қаладағы 1039 көп қабатты үйлерді газбен қамтамасыз етеді. 2011 жылы алдағы қысқы мау­сым­ға дайындық аясында осы газ жүйелерінің бәріне де жөндеу жұмыстары жүргізілді. Қаланың барлық жылу беру орталықтары қатты және сұйық отынмен қамтамасыз етілген. Елімізде қабылданған «2011-2020 жылдары тұрғын үй-комму­нал­дық шаруашылығын модернизациялау бағдарламасы» шең­бе­рінде биылғы жылы Астана қа­ласында 12 көп қабатты тұрғын үйге жөндеу жұмыстары бас­тал­ған. Оның ішінде жалпы құны 310 миллион теңге болатын 9 көп қабатты үйге ағымдағы жөндеу және жалпы құны 120 миллион теңге болатын 3 көп қабатты үйге күрделі жөндеу жұмыстары жүр­гізіледі. Жиналыста қала әкімі Иман­ғали Тасмағамбетов сөз сөйлеп, өт­кен жылғы жылу беру маусы­мы аяқталысымен қалада осын­дай ірі жиналыс өтіп, алдағы жылу беру маусымы қарсаңында атқарылатын жұмыстардың ауқы­мы анықталып, нақты жоспар жа­салғандығын атап көрсетті. Бұл жоспар толық жүзеге асырылды деп бүгін сеніммен айтуға негіз бар. Әкім атап көрсеткендей, №1 және №2 жылу орталықтарының қаланы жылумен толық қамта­ма­сыз етуге мүмкіндігі жетпейді. Осы­ның салдарынан қала қыс айында 111 мың Гкал. жылу қуа­тын осы орталықтар­дан кем ала­ды. Оның орны су ысытатын бу қа­зандарының есебімен толық­ты­ры­ла­ды. Биыл қайта құрудан өт­кен мұндай бу қазандары 150 мың Гкал. қосымша жылу энер­гиясын беретін болады. Яғни, биылғы жылы қаланы жылумен қамтамасыз ету барысында еш­қан­дай тапшылық болмауға тиіс. Осы мәселелерді айта келіп, Иман­ғали Тасмағамбетов өткен мерзімде ат­қарылған ауқымды жұмыстың және ком­муналдық жүйелерге салынған миллион­да­ған инвестициялардың нәтиже­сін­де ал­дағы жылу беру маусы­мын ешқандай проблемасыз және коммуналдық тарифтерді көтер­мей өткізуге толық мүмкіндік жа­салғандығын атап көрсетіп, оны орын­дау жөнінде қысқы жылу беру мау­сымына жауапты кәсіп­орын басшыларының уәдесін алды. Жеңіс даңғылында биылғы жаз маусымында күрделі жөндеу жұмыстары жүргізілгендігін қала жұртшылығы анық біледі. Осы­ған байланысты әкім бұл даң­ғыл­да бұған дейін тек қана жамап-жасқау жұмыстары жүргізіл­ген­дігін, ал биыл бұл даңғыл бой­ындағы барлық инженерлік коммуникациялар түгелдей дерлік жа­ңартылғандығын атап көр­сет­ті. Осы бір ғана даңғылдағы әб­ден тозығы жеткен коммуналдық жүйелерді ауыстыруға қала қор­жынынан 7 миллиард теңге қар­жы жұмсалыпты. Сол сияқты Ә.Мол­дағұлова және А.Иманов көше­лерінде де осындай инженерлік инфрақұрылымдарды то­лық­тай қайта жаңғырту жұмыс­та­ры жүр­гізілген. Сонымен бірге, биыл Самал шағын ауданындағы көп қабатты элиталық үйлерді ор­талық жылу жүйесіне қосу жұ­мысы аяқталған. Қала әкімі атап көр­сеткендей, елорданың барлық жылу тарату жүйелері алдағы жы­лу беру маусымына толық дай­ындық сапына қойылған. Жылқыбай ЖАҒЫПАРҰЛЫ.