Отырысты ашқан Гүлшара Наушақызы бүгінде елімізде Мемлекет басшысы Нұрсұлтан Назарбаевтың бастамасы бойынша Қазақстанның үшінші жаңғыруы іске асырылып жатқанын атап өтті. Ол – саяси реформа, экономикалық жаңғыру және қоғамдық сананы жаңғырту.
«Елбасы биыл үш бірдей тарихи жаңғыруларға жол ашты. Біріншіден, Президент конституциялық реформа арқылы мемлекеттің саяси жаңғыруын қолға алды. Екіншіден, Мемлекет басшысы елімізді технологиялық дамудың жаңа деңгейіне шығаратын Қазақстанның үшінші жаңғыруын айқындады. Үшіншіден, білім, ғылым, мәдениет және тарихты тұтастай қамтитын ұлттық рухани жаңғыру бағдарламасын ұсынды. Осы бағыттарды іске асыру арқылы біз Қазақстанның әлемнің ең озық 30 елінің қатарына енуіне мүмкіндік аламыз. Бүгінгі күн тәртібі аясында біз қоғамның іргетасы болып саналатын отбасы, ана мен баланы мемлекет тарапынан қолдау жұмыстары қалай жүргізіліп жатқанын қарастырамыз», – деді
Г.Әбдіқалықова.
Мемлекеттік хатшының пайымынша, бұл міндеттерді жүзеге асырудағы басты шарт – қоғамдық санасы биік, саламатты әрі білімді ұлт қалыптастыру. Ал адамдардың бойына рухани құндылықтарды қалыптастыруда айқындаушы рөл отбасы институтына тиесілі болғандықтан, отбасы мемлекеттің негізі ретінде айрықша назарды және қамқорлықты, азаматтардың өмір сүру сапасы мен деңгейін жақсартуды талап ететіні анық. Сондықтан, отырыста отбасын, ана мен баланы, сондай-ақ, мүмкіндігі шектеулі балалары бар отбасыларды қолдау жөніндегі мемлекеттік шаралар кешені туралы мәселе қаралды. Мысалы, Еңбек және халықты әлеуметтік қорғау министрлігінің ақпаратына сүйенсек, Қазақстанда тууды ынталандыру мен отба-
сында балаларды тәрбиелеуге жәрдемдесуге, көпбалалы аналардың беделін арттыруға, мүгедек балалар мен олардың отбасыларына, бұған қоса, әлеуметтік жағдайы төмен шаңырақтарға қолұшын созып, көмектесуге бағытталған мемлекеттік жәрдемақылар мен төлемдер жүйесі аясындағы балалы отбасын қолдаудың ұлттық моделі әзірленген.
Елбасының тапсырмасы бойынша, биылғы жылдың 1 шілдесінен бастап баланың тууына біржолғы жәрдемақы мөлшері 20%-ға көбейтілетін болады. Бұған қоса, 2018 жылдың 1 қаңтарынан бастап, ең төменгі күнкөріс мөлшері қайта қаралмақ. Бұл 3 млн азамат үшін базалық зейнетақылардың, мүгедектерге, асыраушыларынан айырылған отбасыларына арналған жәрдемақылардың, мүгедек балаларды тәрбиелеушілерге арналған атаулы көмек пен жәрдемақылардың мөлшерлерін арттыруға мүмкіндік бермек.
Жиында сондай-ақ, халықтың жалпы хабардарлығын арттыру және балаларды барлық зорлық-зомбылықтан, БАҚ-тар мен әлеуметтік желілер және әлеуметтік жарнама арқылы зиянды ақпараттан қорғау жөніндегі мемлекеттік шаралар туралы мәселеге де назар аударылды. Осы орайда, Білім және ғылым, Ақпарат және коммуникациялар министрліктерінің ақпараты бойынша, заңнамаға балалардың денсаулығына, олардың адамгершілігі мен рухани дамуына зиян келтіретін ақпараттан қорғауға бағытталған жаңа нормаларды «баланың жасына сәйкес келетін ақпарат» ұғымын, сонымен бірге, білім ұйымдары мен байланыс операторларына интернет-трафикті сүзгілеу қызметін көрсетуді ұсыну жөніндегі талаптарды бекіту жолымен енгізу жөнінде жұмыс жүргізіліп жатыр екен.
Отырыс қорытындысына сәйкес, Гүлшара Әбдіқалықова көтерілген, талқыға салынған мәселелер бойынша мемлекеттік органдарға бірқатар тапсырма берді.
Ләйла ЕДІЛҚЫЗЫ,
«Егемен Қазақстан»
