Сапардың негізгі мақсаты – шетелдік құқық қорғау мен сот органдарының жұмысы аясында тәжірибе алмасу мен бөлісу, үйрену мақсатында ұйымдастырылған.
Делегация құрамында Конституциялық кеңестің төрағасы Игорь Рогов, ішкі істер министрі Қалмұханбет Қасымов, Мемлекеттік қызмет істері және сыбайлас жемқорлыққа қарсы іс-қимыл агенттігінің төрағасы Қайрат Қожамжаров, Бас Прокурордың орынбасары Ерлік Кененбаев, сондай-ақ, Жоғарғы сот, ҰҚК, Ұлттық бюро мен МКД-нің өкілдері болды.
Қазақстандық делегация басшысы Талғат Донақов неміс әріптестерінің ыстық ықыластарына алғысын білдірді. Өзінің алғы сөзінде ол: «Германия прокуратурасының жұмыс істеуінің ерекшелігі, әсіресе, қылмыстық процесс қызықтырады. Біз Қазақстанның құқық қорғау жүйесін жетілдірудің барысын жасау үстіндеміз», деп атап өтті.
Жұмыс сапары шеңберінде делегация Майндағы Франкфурт қаласының прокуратурасы ғимаратында болды. Онда неміс әріптестеріміз өздерінің қылмыстық істер бойынша сотқа дейінгі өндірістің ерекшелігі мен ведомство жұмысының ұйымдастырылу тәртібімен бөлісті. Сонымен қатар, Учаскелік сот пен Қалалық полиция басқармаларының жұмысымен танысты.
Висбаден қаласында Гессен жерінің Әділет министрлігінің өкілдерімен кездесу өтті.
Өз кезегінде полицейлер бандитизмге, адам өмірі мен басқа да меншікке қатысты қылмыстарды тергеу тәжірибелерімен бөлісіп, пікір алмасты.
