БҰҰ Өркениеттер альянсінің (UNAOC) жоғары өкілі Насир Абдулазиз әл-Насер ҚазҰУ ректоры Ғалым Мұтановпен ынтымақтастық және бірлесіп жұмыс істеу жөнінде келісімге қол қоя отырып, 2020 жыл әл-Фараби жылы болуы керек деген ұсыныс айтты.
Қазақстандық жоғары оқу орнына ресми сапармен алғаш рет келіп отырған БҰҰ жоғары мәртебелі өкілі қатысқан іс-шараға ҚазҰУ басшылығы, оқытушылар мен студенттер, дипломатиялық миссия, қоғам және бұқаралық ақпарат құралдарының өкілдері қатысты.
ҚазҰУ ректоры, академик Ғалым Мұтанов қадірлі мейманды университет қызметімен және жетістіктерімен, БҰҰ-ның тұрақты даму жөніндегі «Академиялық ықпал» бағдарламасының жаһандық хабы жайлы жұмыстарымен кеңінен таныстырды.
Кездесуде Насир Абдулазиз әл-Насер БҰҰ Өркениеттер альянсінің жұмысы, қызметінің негізгі бағыттары мен академиялық бірлестіктің альянс бағдарламаларына қатысуы туралы айтты. «Үздік жоғары оқу орындарының бірі болып табылатын мұндай беделді университеттің оқытушылары мен студенттерінің алдында сөз сөйлеу мен үшін үлкен мәртебе. UNAOC сіздердің университеттеріңіз тәрізді оқу орындарының мәдениеттер диалогында өмірлік маңызды рөл атқаратынын мойындайды», – деді БҰҰ Өркениеттер альянсінің басшысы.
Ол өз сөзінде, сондай-ақ, білім берудің альянс жұмысындағы басты басымдықтың бірі екендігін атап өтті. «Жастарға үлкен көңіл бөлінуде, жаһандық түрлі жобаларға көптеген университеттер қосылуда және олар ұйымның мәдениетаралық диалог, бейбітшілік пен өркениетті сақтау жөніндегі бастамаларына қолдау көрсетуде», – деді ол.
Насир Абдулазиз әл-Насер ғаламдық күн тәртібіндегі сұрақтарға толыққанды жауап берді. Ол Қазақстанның әлемдік қоғамдастықтың қолдауына ие болған ядролық қаруды таратпау және аймақтық қауіпсіздікті сақтау жөніндегі бейбіт бастамаларын, Сириядағы жағдайды реттеуге қосқан мемлекеттің үлесін айрықша атап өтті.
«Радикалды экстремистер өздерін жақтаушыларды жастар арасынан іздейді, оған себеп – сауатсыздық, кедейлік және жұмыссыздық. Мектепте және университеттерде жастарды мәдениеттілікке үйрету маңызды, біз бір-бірімізді құрметтей білуіміз керек. Білім, ғылым және жаңа технологиялар әлемнің тұрақты дамуының негізі болуы тиіс. Бұл ұжымдық күшті талап етеді. Қазақстан бейбітшілік пен тұрақтылықты сақтауға көп күш салуда, біз оны бағалаймыз», – деді БҰҰ Өркениеттер альянсінің жетекшісі.
Бұл кездесудегі қозғалған басты тақырыптың бірі – ЮНЕСКО қолдауымен 2020 жылды «Әл-Фараби жылы» деп жариялау бастамасы болды. Ұлы философтың 1150 жылдық мерейтойына орай халықаралық деңгейде іс-шаралар өткізу туралы ҚазҰУ идеясына қолдау білдірген БҰҰ Өркениеттер альянсінің жоғары өкілі: «БҰҰ-ның тұрақты даму бойынша «Академиялық ықпал» жаһандық хабын басқаратын әл-Фараби атындағы Қазақ ұлттық университеті – әлемге танымал ғылым мен білім орталығы. Бұл ұлы ойшыл және үздік философ ибн Әбу Насыр әл-Фарабидің құр-
метіне аталған жалғыз оқу орны. Оның мұрасы күні бүгінге дейін ақыл мен жүректі байытып, білімнің қайта жаңарған күшінің жарқын үлгісі болып табылады», – деді.
Ғылыми кеңестің шешімімен білім мен ғылымның дамуына қосқан айрықша үлесі үшін Насир Абдулазиз әл-Насерге университеттің құрметті докторы атағы берілді. Оны растайтын құжат пен мантияны ЖОО ректоры Ғалым Мұтанов БҰҰ Өркениеттер альянсі жетекшісіне салтанатты түрде табыстады.
Мира БАЙБЕК,
«Егемен Қазақстан»
АЛМАТЫ
