Гүлшара Наушақызы: «Қазақстан азаматтығын алуға және одан шығуға өтініш берушілердің құжаттары құқық қорғау органдарында алдын ала сараптамадан өткізілді. Қазіргі таңда елімізде жан-жақты жаңғыру реформалары жүргізіліп жатқаны өздеріңізге белгілі. Бұл мәселе Елбасы Нұрсұлтан Назарбаевтың саяси-экономикалық және рухани жаңғырулар жөніндегі стратегиялық құжаттарында нақты көрсетілді», дей келе, Қазақстан азаматтығын алатын әрбір адамның мемлекеттік дәстүрлерді, Қазақстанның құндылықтарын терең білуі, оларды құрмет тұтуы өте өзекті мәселе екенін жеткізді.
Бұдан кейін Мемлекеттік хатшы тәуелсіздік алған сәттен бастап Қазақстанның азаматы болуға ниет білдіруші адамдар санының ұдайы өсуі байқалатынына, осы жылдар ішінде еліміздің халықаралық беделі айтарлықтай өскендігіне тоқтала келе, бұл Президент Н.Назарбаевтың басшылығының арқасындағы этносаралық қатынастың жоғары мәдениетін және Қазақстанның әлеуметтік-экономикалық, қоғамдық-саяси дамуындағы нық қадамдарын айқындайтынына назар аударды.
Өз сөзінде Гүлшара Наушақызы Мемлекеттік рәміздер күні қарсаңында еліміздің жаңа азматтарын қарсы алуға ерекше қуанышты екенін, оларға Отанымыздың игілігі жолында бақытты өмір және табысты жұмыс тілейтінін айтты. Сондай-ақ, еліміздің лайықты азаматтары бола отырып, олардың егемен Қазақстанның одан әрі дамуы мен өркендеуіне өз үлестерін қосатындарына сенім білдірді.
Отырыста Қазақстан азаматтығына қабылдау және одан шығу мәселелері жан-жақты қарастырылды. Елбасы тиісті Жарлыққа қол қойғаннан кейін бізге жақын және алыс шетелдерден келген түрлі этностардың 640 өкілі қазақстандық атанатын болады.
Комиссия отырысының қорытындысы бойынша тиісті шешімдер мен ұсынымдар қабылданды.
