Футбол
Футболдан Қазақстан кубогы жолындағы жарыстың бірінші жартылай финалдық ойындары өтті. Шымкенттің «Ордабасы» клубы өз алаңында «Қайратпен» 0:0 есебімен тең түсті. Бұл кездесуде «Қайраттың» қорғаушысы Елдос Ахметов өрескел ойыны үшін 74-минутта алаңнан қуылды.
Ал өз алаңында «Атырауды» қабылдаған Қарағандының «Шахтері» 1:0 есебімен жеңіске жетті. Ойын тағдырын шешкен жалғыз голды матчтың 25-минутында «кеншілердің» шабуылшысы Дәуренбек Тәжімбетов соқты.
Жартылай финалдың қарымта ойындары 21 маусым күні өтеді.
Велоспорт
Мамыр айының 28-і күні Алматыда дәстүрлі велошеру өтеді. Осымен бесінші рет ұйымдастырылып отырған бұл спорттық шарада велошабандоздар 10 шақырым қашықтық бойынша күш сынайды. Шеру әл-Фараби даңғылынан басталып, М.Горький атындағы демалыс саябағында мәресіне жетеді.
Велошеру аяқталған соң шағын концерт ұйымдастырылып, жанкүйерлер арасында бағалы сыйлықтар ойнатылады.
Шөген
Кеше Германияның Мюнхен қаласында шөген спортынан «Munich Gold Cup-2017» халықаралық турнирі басталды.
Әлемнің ең мықты шөгеншілері бақ сынайтын бұл бәсекеде Қазақстаннан қос команда – «Astana Polo Club» және «Almaty Polo Club» ұжымдары өнер көрсетеді.
Авторалли
Маңғыстауда «Ралли Қазақстан-2017» турнирінің төртінші кезеңі аяқталды. FIA Халықаралық автомобиль федерациясы рейдінің раллиден Әлем кубогының бесінші кезеңіне жататын бұл жарыста Қатардың Нассер әл-Аттия бастаған экипажы бірінші келді. Aktau Motorsport командасының экипажы аталған кезеңде тәуір өнер көрсетіп, өзінің осы турнирдегі жалпы нәтижесін жақсартып алды.
Әзірлеген Қайрат ЖҮНІСҰЛЫ
