Бірнеше күннен бері. Халықаралық «ЭКСПО» көрмесінің қарсаңында, 25 мамырда жалауы желбіреген дүбірлі доданың ашылу салтанатына осы сайысты бақылау комитетінің төрағасы, Азия волейбол конфедерациясының өкілі Цзичжон Вэй арнайы қатысып, спорттық шараны жоғары деңгейде ұйымдастырғаны үшін аймақ басшысы Даниал Ахметовке алғыс айтып, естелік сыйлық табыстады. Салтанатты шараны құттықтау сөзімен ашқан облыс әкімі мұндай мәртебелі жарыстың Шығыс Қазақстан топырағында өтуі өңір жұртшылығының ортақ жеңісі екендігін айтты.
«Баршаңызды осынау спорт мерекесінің басталуымен шын жүректен құттықтаймын. Жапония, Қытай, Тайланд, Тайпей, Иран, Вьетнам, Филиппин елдерінің спортшыларына қонақжай Шығыс Қазақстан жеріне қош келдіңіздер дейміз. Бізге осындай ауқымды шараны өткізу міндетін сеніп тапсырған Азия волейбол конфедерациясы басшылығына алғыс айтамыз. Құрлықтың кіл мықтылары қатысатын жарыс тартысты да тартымды ойындарға толы болады деп сенеміз», − деді Д.Ахметов.
Салтанатты шараның шымылдығы түрілгеннен кейін алаңға ел намысын қорғайтын өскемендік «Алтай» мен Тайпейдің «Тайвань Пауэр» командалары шығып, біздің бұрымдылар бес кезеңге созылған ойында 3:2 есебімен жеңіске жетті. Ертеңінде «Алтай» арулары Тайландтың «Супреме» командасымен шеберлік байқасып, есе жіберіп алды. Жиырма жетінші мамыр күні өскемендік ала доп шеберлері Иранның «Сармайе Банк» командасымен кездесіп, оларды 3:0 есебімен ойсырата жеңіп, ширек финал жолдамасын иеленді.
Азамат ҚАСЫМ,
«Егемен Қазақстан»
ӨСКЕМЕН
