Кен өндіру орнында төтенше жағдай жарияланды, жұмысшылар қауіпсіз жерге жеткізіліп, жұмыс уақытша тоқтатылды. 31 мамырда облыстық экология департаменті оқиға орнында тексеру жұмыстарын бастады.
«Теңізшевройл» ЖШС осы жағдай бойынша брифинг өткізіп, түсінік берді. ҚР Энергетика министрлігі Экологияны реттеу және бақылау комитеті төрағасының міндетін атқарушы Азамат Әлімбаевтың айтуынша, әзірге атылған газ көлемі белгісіз. Тексеру аяқталған соң газ көлемін негізге алып, шығын анықталады. Ал апаттың басты себебі – электр энергиясының кенеттен өшуі болып отыр. ТШО-ның өндіріс бойынша бас менеджері Имир Боннер «Зауыт аумағында ауаға тараған күкірт аралас газ зиянды емес» деп мәлімдеді. Өндіріс орнындағы күнделікті ауа тексеретін мониторинг нәтижелері газды қауіпсіз деп көрсеткен. Алайда, жергілікті эколог мамандар шетелдік компания өкілінің бұл жауабына келіспейді. «Қандай газ жағылса да, ауаға тасталатын ластағыш заттар зиянсыз болмайды»-дейді облыстық экология департаментінің басшысы Қабижан Қапанов. Тексерудің нақты нәтижесі бір айдан кейін белгілі болады.
Бақытгүл Бабаш,
«Егемен Қазақстан».
Атырау.
