Операның дирижерлік тізгіні маэстро Алан Бөрібаевтың қолында болса, қоюшы режиссері – белгілі италиялық өнер тарланы Джанкарло дель Монако. Спектакльдің сценографы – Эцио Фриджерио. Костюмер суретшісі – «Оскар» сыйлығының иегері Франка Скуарчапино. Қоюшы хореографтар – Қазақстанның еңбек сіңірген қайраткерлері Тұрсынбек Нұрқалиев пен Ғалия Бөрібаева.
«Біз бұл шығарманы кездейсоқ таңдаған жоқпыз, – дейді «Астана Опера» театрының директоры Ғалым Ахмедьяров. – Өйткені, бұл біздің ұлттық өнеріміздің бірегей туындысы, сондықтан да, спектакль көрермен көңілінен шығады деген үміт зор».
Аталмыш театрдың бас дирижері Алан Бөрібаевтың пікірінше, «Абай» операсы әр кезеңдерге лайықталып жазылған ұлы музыкалық шығармалардың бірі болып табылады әрі орындаушылардың биік талғамына татитын ерекше туынды.
Операның басты рөлдерін отандық әртістер – Қазақстанның еңбек сіңірген қайраткерлері Сүндет Байғожин мен Дина Хамзина және Қазақстанның еңбек сіңірген әртісі, опера примасы Майра Мұхамедқызы, халықаралық байқаулардың лауреаты Мейір Бәйнеш орындаса, келесі бір рөлге армениялық танымал әртіс Барсег Туманян шақырылып отыр.
Азамат Мәуленұлы,
Л.Н.Гумилев атындағы Еуразия ұлттық университетінің студенті
