Қытай басшысының аталмыш кітабы 2014 жылы жарыққа шыққан. Содан бері әлемнің 20 шақты тіліне аударылып, 6 миллионнан аса данамен жарық көрген таңдаулы еңбектердің қатарына енді. Қазақ тіліндегі нұсқасы елордадағы «Фолиант» баспасынан жарық көрді. Кітаптың таныстырылымы Қазақстан Республикасының Тұңғыш Президенті – Елбасы кітапханасында өтті. Ресми шараға Қазақстан мен Қытай тарапынан лауазымды қонақтар қатысты.
Кітаптың тұсаукесер рәсімі ҚХР Төрағасы Си Цзиньпиннің Астанаға ресми сапарына орай ұйымдастырылды. Шарада ҚХР-дың Қазақстандағы Төтенше және өкілетті елшісі Чжан Ханьхой екі тараптың да 25 жыл ішінде жақсы жетістіктерге қол жеткізгенін баяндады.
Ал, Қазақстан Президенті Кеңсесі жетекшісінің орынбасары Бақытжан Темірболат «Ел басқару жөнінде» атты кітаптың мазмұнымен таныстырды. Оның айтуынша, Қытай Халық Республикасының Төрағасы Си Цзиньпиннің «Ел басқару жөнінде» деп аталатын кітабы 18 тараудан тұрады. Онда Қытай үлгісіндегі социализмге табанды болу және оны дамыту, Жұңхуа ұлтының ұлы гүлденуі сынды қытай арманын жүзеге асыру, реформаларды жан-жақты жетілдіру, Қытайды заңмен басқару арқылы өркендету, экологиялық өркениетті көркейту, т.б идеялар басшылыққа алынған.
− Кітаптың қазақ тіліне аударылуы Мемлекет басшысының үздік заманауи әдебиеттерді қазақ тіліне тәржімалау туралы тапсырмасына сәйкесіп тұр. Сондай-ақ, елімізде жүргізіліп жатқан Үшінші жаңғырту аясында кітап үлкен сұранысқа ие болады деп есептеймін, – деді шарада сөз алған Тұңғыш Президент – Елбасы қоры жанындағы Әлемдік экономика және саясат институтының директоры Ержан Салтыбаев. Ол сондай-ақ, осы еңбекте Си Цзиньпиннің саяси философиясы, Қытай Халық Республикасының ішкі және сыртқы саясаты дамуының негізгі стратегиялық бағыттары анықталып жазылғанын атап өтті.
ҚХР Мемлекеттік кеңесі Баспасөз кеңсесінің жаһандық коммуникация бюросы директорының орынбасары Туо Жень кітапты өзі қызмет ететін мекеменің құрастырғанын, ал, ҚХР азшылық ұлттар баспа үйі қазақ тіліне аударғанын айта келе, кітапқа Қытай басшысының 70-тен астам негізгі мақалалары, баяндамалары, лекциялары, түрлі шараларда сөйлеген сөздері мен 40-тан астам фотосурет топтастырылғанын жеткізді.
Айгүл СЕЙІЛОВА,
«Егемен Қазақстан»
Суретті түсірген
Ерлан ОМАРОВ,
«Егемен Қазақстан»
