Бұл туралы Қазақстан Сыртқы істер министрлігінің баспасөз қызметі хабарлады.
Аталған шараны Қазақстанның Нидерландтағы елшілігі мен осы елдегі саяси және іскер топтар арасында өзіндік беделі бар Sociëteit De Witte клубы бірлесе ұйымдастырды.
Қазақстанның Нидерланд Корольдігіндегі Төтенше және өкілетті елшісі Мағжан Ілиясов қазіргі таңдағы өзекті саяси және әлеуметтік-экономикалық үдерістерді назарға ала отырып, дөңгелек үстелге қатысушыларды елдегі жүзеге асырылу үстіндегі реформалардың басымдықтары мен мақсаттары туралы толыққанды таныстырып өтті.
М.Ілиясов Қазақстан-Нидерланд ынтымақтастығын сапалы түрде нығайтуға мүмкіндік ашып отырған «Қазақстанның Үшінші жаңғыруы: жаһандық бәсекеге қабілеттілік» бағдарламасын іске асыру үрдісіне айрықша тоқталды. Атап айтқанда, жиын барысында ауыл шаруашылығы, IT-технологиялар, көлік-логистика, 3D-принтинг салаларындағы екіжақты іс-қимылды дамыту мүмкіндіктеріне баса назар аударылды.
Қазақстанның бастамаларын таныстыруға мүмкіндік берген дөңгелек үстелге қатысушылар Қазақстан Үкіметінің шетел инвесторларына жасап отырған құқықтық кепілдемелерін, жеңілдіктер мен преференциялар жасау, шетелдік капиталы бар кәсіпорындардың жұмысын ынталандыруға бағытталған әрекеттерін жоғары бағалады. Пікір алмасу аясында Қазақстанның Тәуелсіздік жылдарындағы жетістіктері атап өтіліп, рухани жаңғыру жолында жүзеге асырылу үстіндегі мемлекеттік реформалар оң бағаға ие болды.
