Бағдарлама игілігі баршаға ортақ

Кезінде көне шаһар кел­беті адам айтқысыз жаң­ғы­р­ып, жаңарып еді. Қалада қос бірдей «Астана» және «Бәй­терек» шағын аудандары бой көтеріп, шаһардың шырайын кіргізіп қана қоймай, тұрғындардың тілегін де қанағаттандырған. Себебі, үйсіз-күйсіз жүрген талай жас және аз қамтылған отба­сылар, сондай-ақ өзге де аза­маттар баспаналы болып, қо­ныс тойын тойлаған болатын. Ендігі жерде тараздық тұр­ғындардың тағы да бас­паналы болу бақытын бас­тан кешіретін күні алыс емес...
«Нұрлы жер» бағ­дар­ла­­ма­сы талай азаматтың бас­пана­лы болуына ықпал ететін игі бастама ретінде ха­лық қолдауына ие болды. Бұл бір жағынан, мем­лекеттік жеңілдікпен тұр­ғын­дарды баспанамен және жер­мен қамтамасыз ететін бол­са, екіншіден, жерлерді иге­руге және жұмыс орын­да­рының ашылуына да кө­ме­­гін тигізеді. Ал шаһар бас­­шысы Рүстем Дәулет «Нұр­лы жер» бағдарламасы ая­сында, бүгінде жеке тұр­ғын үйлер салу бойынша қанатқақты жобаны іске асыру мақсатында жұмыстар жүр­гізіліп жатқанын айтты. 
Облыс орталығы Тараз қа­ласының өзінде үш жүз мыңнан астам адам тұрады. Ал енді әрқайсысының әлеу­мет­­тік те, экономикалық та мәселесінің бар еке­нін ескерсек, оларды ше­шіп беретін «Нұрлы жер» бағдарламасының ти­­імділігін бірден кө­ру­ге бола­ды. Қазірде Ы.Сү­лей­ме­нов көшесінің со­ңы­нан 4 жер телімі беріліп, атал­ған бағдарлама аясында ол жерде алғашқы тұрғын үй­лердің құрылысы басталып та кетті. Қала әкімінің ай­ту­ынша, жалпы осы жоба бой­ынша 200 тұрғын үйдің құ­рылысын жүргізу жоспарланып отыр екен. Расында да аталған жоба бағдарлама аясында толықтай іске ас­қанда, мыңдаған отбасы баспаналы болады деген сөз. Бұл тұрғыда да қала тұр­ғындары мемлекеттік бағ­дарламалардың игілігін се­зінуде. Сонымен қатар, қа­зір көпшіліктің оқу жайы­мен, не болмаса жұмыс ба­бымен 
ауылдан қалаға кө­шіп келетіні шын. Ал егер мұнда үй-жай болма­са, онда тірліктің қиюы қа­шып, қисыны келмейді. Қа­зақ айтқан «Үйі жоқтың – күйі жоқ» деген мақалдың растығына сонда көз жетеді. Ал әрбір тұрғынның тілегіне құлақ асып, әрбір азаматтың тағ­дыры толғандырған Ел­басы «Нұрлы жер» бағ­дар­ламасы аясында жұмыс істеуді әкімдерге тапсырды. Оның алғашқы нәтижелері бүгінде көрініп отыр. 
 Сондай-ақ, қалалық жер бөлімінде 2005 жылдан бері жеке тұрғын үй салу үшін жер кезегінде тұрған 200 азаматқа «Нұрлы жер» бағдарламасы бойынша жер берілетіні туралы хабарлама шығарылғаны да бағдарламаның әлеуметтік маңызының жоғары екенін көр­сетеді. Енді бұл жерлер­ге де тұрғындар тиісті құ­рылыс жұмыстарын жүр­гізіп, өзінің тіршілік қа­же­тіне сай жағдайын жасап алатын болады.
«Нұрлы жер» бағ­дар­ла­масы аясында Сабалақов кө­шесіндегі 362 гектар жер­ге 117 көп қабатты жә­не 914 жеке тұрғын үй­лердің құрылысы жүр­гі­зіледі. Бүгінде бұл жерлер­де жылу, кәріз, су, газ жү­йе­­леріне қатысты құры­лыс жұ­мыстары басталып кет­ті. Қала басшылығы бұл жұ­мыстардың барлығы да жыл­дың соңына дейін аяқ­та­лады деп отыр.
Әрине, «Нұрлы жер» бағ­дарламасының Әулиеата өңі­ріне игілігі көп. Сонымен қатар, бағдарлама аясында «Автобекет» маңын­да­ғы 100 гектар жерге де құ­рылыс жұмыстарын жүр­гізу жос­парланып отыр екен. Атап айтсақ, бұл алқапта болашақта 52 үй бой көтеретін болады. Мұның бәрі «Нұрлы жер» бағдарламасы аясын­да қолға алынып, бо­ла­шақ­та аяқталады деп жос­парланғанымен, тұр­ғын­­дар үшін жуық арада та­ғы бір айтулы жаңалық бар. Бұл тұрғыда қала әкімі Рүс­тем Дәулет шаһардағы тұр­ғын үйлерге қатысты нақты мәліметті жеткізді. 
«Арай» тұрғын-жай ке­шенінде де қазір жоғары сапалы үйлер салынуда. Өткен жылы 80 пәтерлі 2 үй пайдалануға берілген бо­латын. Бүгінде ол жерде 19 үйдің құрылысы жүр­гізілуде. Сондай-ақ, ағым­дағы жылдың бірінші жар­тыжылдығында 6 үй тапсырылады. Бұл үй­лерді халық «Тұрғынүй­құрылысжинақбанкі» АҚ арқылы ала алады. Та­ғы бір айта кетерлігі, жалға берілетін 2 көп қа­батты тұрғын үйге ақша бөлінген болатын. Қазіргі таңда жұмыстар басталып кет­ті», деді әкім. Ал екі бір­дей шағын ауданға атау беру мәселесіне келсек, ол қо­ғамның талқысына ұсы­­ныл­ған екен. «Аталған мә­се­леде кеңірек ойлануымыз ке­рек. Атаулар еліміздің ерек­шелігін танытатын жә­не көне Тараз қаласының ай­шығын көрсететіндей бол­ғаны дұрыс. Айтылып жат­қан ұсыныстар мен ойлар көп. Болашақта мұның бәрі де ескеріледі», деді Рүстем Рысбайұлы.
Өңірде «Нұрлы жол» және индустрияландыру бағ­дарламалары бойынша да қолға алынған жұмыстар жетерлік. Ал талай шайыр­ жырға қосқан, талай сұ­лу­дың сылқым күлкісі мен табан ізі қалған Тараз бо­йымен Талас өзені ағып жатыр. Әсіресе, Шығыстың көп­теген жазбаларында деректер келтірілетін Талас өзенінің өзіне тән табиғи болмысы бар. Сол тарихи табиғилықты сақтай отырып, өзеннің екі бетін де халықтың демалатын орнына айналдыру және ол жерге бау-бақшалар салу жоспарда бар екен. Сондай-ақ, «Автобекет» маңынан бой көтеретін шағын аудан ау­мағына «Нұрлы жер» 
жә­не «Нұрлы жол» бағ­дар­ламалары бойынша мектеп, ау­рухана, бала­бақ­ша, неке са­райы, жолдар салынып, сквер жасалып, өз алдына жеке қалашық болады деп күтілуде. 
Көп ретте Тараз тура­лы сөз болғанда, оның кө­не­лігі мен тарихилығы ба­са айтылады. Расында да ғасырлармен құрдас, дәу­ірлермен сырлас болған ша­һар­дың кешегі келбеті мен бү­гінгі келбетін астастыра оты­рып, ақиқат туынды жа­сау қажеттігі туындады. Сондықтан да Қазақ хан­дығының 550 жылдық дү­бір­лі тойы қарсаңында көне мекеннен бақылау мұнарасы бой көтеріп, «Мыңбұлақ» ск­вері мен «Тілек» ағашы са­лынды. Ал бүгінгі таңға дей­ін жерасты музейі жұ­мы­сының жүріп жатуы да тарихтың тереңдігінен мол мағлұмат береді. 
Мемлекеттік бағ­дар­ла­ма­лардың баршаға ортақ игі­лік екенін осындайдан кө­руге болады. Себебі, бір ша­һарда тұратын мыңдаған адам­дардың арман-тілегі оры­н­­далып, ой-сенімі де ны­ғая түседі. Бұл ретте Елбасы айт­­қан Рухани жаңғыру тұ­жы­рымдамасы болашаққа бастайтын бірыңғай биік бастама бола алады. Рухани жаңғырудың да еңбек арқылы ғана нәтижелі болатыны белгілі. Бағдарламалардың бірыңғай бастамасы өңірде бұдан былай да жалғасын таба беретін болады.

Хамит Есаман,
«Егемен Қазақстан»

Жамбыл облысы