![Сыр өңірінен ЭКСПО-ға күніне 150 жолаушы аттанады](/article_photo/1497066207_article_b.jpeg)
Әлемдік деңгейдегі ауқымды шараға қатысуға мүмкіндік алған 37 қызылордалық тұрғынның арасында «Қызылорда тазалығы» мен «Қызылорда су жүйесі» мемлекеттік коммуналдық кәсіпорнының мамандары да бар. Шығарып салу шарасына арнайы қатысқан қала әкімінің орынбасары Нұрлан Мақсұтов жолаушылардың сапарларына сәттілік тіледі.
«ЭКСПО-2017 - барша қазақстандықтар асыға күтіп жүрген маңызды шара. Ол білім мен инновациялық салада тәжірибе алмасу, мәдени-рухани байланысты нығайту және ынтымақтастықты дамыту мақсаттарын көздейді. Беделді шараға 100-ден астам ел мен 10-ға тарта түрлі бағыттағы халықаралық ұйым мүшелері қатысуға ниет білдірген. Осындай іргелі шараны тамашалауға мүмкіндік алған жандарға ақжол тілеймін», деді қала әкімінің орынбасары.
Айта кетейік, бұған дейін қала әкімдігі мен «ТрансТурСервис-Қызылорда» жолаушылар компаниясы арасында тасымалдау жұмыстары бойынша арнайы келіссөз жасалған еді. Нәтижесінде көрменің өту мерзімі кезеңдерінде облыс орталығынан 4 автобус пен «Қызылорда-Петропавл», «Қызылорда-Көкшетау» және «Тальго» жүрдек пойыздары қатынайды деп жоспарланған. Көрмеге өңірден тәулігіне 150-ге жуық жолаушы барады деп жоспарланып отыр.