Көктем келіп, күн жылына басы толатын бақбақты үлбіретіп сән ретінде тағуға да болады екен. Астаналық Наталья Пономареваның тұмса табиғатты сыйдырған кішкентай әшекейлеріне қарап тұрып көктем қайта туғандай әсерде қалдық. Алқа гүлдер тұқымдасына жататын улы итжидек те мөлдір шынының ішіне момақан қалыпта сыйып кетіпті. Одан бөлек бітеугүл, раушан мен әртүрлі бақша гүлдері де сырға мен сақина болып шыға келген.
– Ресейлік шеберлердің зергерлік шайырдан жасалған бұйымдарын интернеттен көріп, қатты қызықтым. Отбасымызбен осы салаға әуестеніп кеттік. Табиғат аясына шыға қалсақ болды, ерекше шөптер мен гүлдерді жинап жүретін болдық, – деген шебер бұйымдарын негізінен қалалық жәрмеңкелерге шығару арқылы сататынын айтты. Мұндай әшекейлерді жасау үшін эпоксидті шайырды белгілі бір формаға келтіріп, құю арқылы жасалады. Сапалы жасалған бұйым бірнеше жылға дейін сақталады.
Жәрмеңкеге арнайы келген БҰҰ-ның «ЭКСПО-2017» бас комиссары Жихан Сұлтаноғлы қолданбалы өнер шеберлерінің жетістіктері мен мүмкіндіктері турасында айта келіп, өнердің баршаға ортақ екенін жеткізді.
– Өз елдеріңіздің тарихы мен сұлулығын түстер алуандығы мен шығармашылықтарыңыз арқылы паш етесіздер. Шын мәнісінде өнер – ортақ, оны жас та, кәрі де түсінеді, – дейді Жихан Сұлтаноғлы. Бас комиссар көпшілікті жәрмеңкеге қатысуға шақырып, шеберлердің ісіне сәттілік тіледі.
Қызылордалық Айсұлу Садықованың адамдар мен жануарларды, табиғат элементтерін бейнелейтін ойыншықтар жасап келе жатқанына 12 жылдан асқан. Оның қолынан шыққан «Байдың қызы» атты қуыршақтың пошымынан өмірден қиындық көрмеген еркетотай қыздың дүңк етпе мінезі бірден байқалады. Оның айтуынша, кейіпкер бейнесін жасауда көбіне қазақ халқының аңыз-әңгімелеріне, қиял-ғажайып ертегілеріне жүгінеді.
– Әкем ағаштан түйін түйетін шебер. Ұл бала жоқ болғандықтан, кішкентайымнан әкеме көмектесіп жүріп, қыр-сырына қанығып өстім. Көрмеге қатысып жүргенде киізден ойыншықтар жасауға болатынын көріп, осы салаға ойыса бастадым. Қазір Түркістан қаласынан қолөнер бұйымдары дүкенін ашып жатырмын, – деген Айсұлу қуыршақ жасаудың қиын еместігін айтады.
Ая ӨМІРТАЙ,
«Егемен Қазақстан»
Суретті түсірген
Ерлан ОМАРОВ,
«Егемен Қазақстан»
