Фильмге «Арди» оңалту орталығының тәрбиеленушісі Динара Шәріпованың өмірі арқау болған. Басты рөлді де Динараның өзі ойнайды. Айрықша киножобада басты рөлдерден басқа кейіпкерлерді де «АРДИ» оңалту орталығының оқушылары бейнелейді. Сол сияқты «Өлсем бе, әлде қалсам ба?!» дилогиясының алғашқы бөліміндегі басты рөлдегі Тахир Омаровқа да басты рөлдің бірі бұйырып тұр. Сондай-ақ, фильмге Эмир Байғазиннің «Төрт оқиға» фильмінде басты рөлді сомдаған Қанағат Тасқараев та түседі.
Аталмыш картинаның дайындық жұмыстары сәуір айының бел ортасынан басталған болатын. Осы аралықта сценарий жазылып, фото және бейне байқаулар жасалып, түсірілім локациялары анықталыпты. Дайындық кезеңінде режиссер кино әлеміне жолдама алған актерлардың дикциясын дұрыс қою үшін, логопедтер жұмыс істегенін айтады.
– «Қыз бен теңіз» фильмі «Шексіз мүмкіндіктер» дилогиясының екінші бөлімі десек те болады. «Өлсем бе, әлде қалсам ба?!» атты бірінші бөлім арқылы біз сал ауруына ұшыраған жас жігіттің өмірін көрсетуге тырыстық. Ал осы фильмде Әселдің тағдыры арқылы армандар алға жетелейтінін, үміттер үзілмейтінін баяндамақпыз. Картинаның басты кейіпкері өзінің өмірге деген құштарлығымен, ерекше мейірман мінезімен дара. Жоғары білім алып, қаладағы банктердің бірінде жұмыс істейді. Шығармашылыққа да өте жақын. Башпайымен сурет салып, дені сау адамдарға өз-өзіне сенуге көмектеседі. Фильмде біз оның ішкі жан дүниесінің шексіз байлығын ашып көрсетпекпіз, – дейді фильмнің режиссері әрі продюсері Әзизжан Заиров.
Мәдениет және спорт министрлігінің тапсырысы бойынша қолға алынған картина Алматыда екі ай бойы түсіріледі деп жоспарланған.
Айнаш Есали,
«Егемен Қазақстан»
Алматы
