Қасиетті түн жайлы ардақты Пайғамбарымыз (с.а.у.): «Рамазан айында мың айдан артық бір түн бар. Кім оның жақсылығынан мақұрым қалған болса, шын мәнісінде көп нәрседен мақұрым қалғаны», деген екен. Сол сияқты, бұл түнді мінәжат етумен өткізген мүмінге берілетін сауап – мың айлық құлшылыққа тең болатыны жайлы да Құранның «Қадір» сүресінде баян етілген.
Бұл түннің маңызы жайлы үлкен ғалым-сахаба Әбдулла ибн Аббас: «Қадір түнінде – адамның бір жылғы ризық-несібесі тағдырына жазылады», десе, Құранның «Духан» сүресінде, осы түнде алғашқы аяттар түскені жайлы дәлел айтылады.
Мұндай берекелі сәтті бекер өткізу мұсылман баласы үшін өкініш. Өйткені, бұл түнде тілеген дұға-тілек қабыл болады, күнәлар кешіріледі. Атақты хадисші-ғалым Суфуанус Сәури: «Қадір түні дұға етіп, Алладан кешірім сұрап, тілек тілеу – намаз оқудан қайырлы, егер аяттар оқылып, артынан дұға жасалса, тіптен жақсы», деген екен.
Қадірлі бауырлар, қасиетті түні тілеген тілектеріңіз қабыл болып, Алла елімізге тыныштық, халқымызға ынтымақ пен берекелі өмір нәсіп еткей!
Бекен ҚАЙРАТҰЛЫ,
«Егемен Қазақстан»
