Ұйымдастырылған шараға қатысқан облыстық денсаулық сақтау басқармасының басшысы Мәншүк Аймұрзиева: «Бұл жоба алдағы үш ай ішінде барлық емханаларда қолданысқа енгізіледі», деді.
Электронды кезек жобасы тұрғындардың уақытын үнемдейді әрі емдеу мекемелеріндегі тәртіпті сақтауға бағытталған. Аталған жүйе әр кабинетте орнатылады және оның ерекшеліктерін медицина мамандарына оқыту жайы қарастырылып жатыр.
Атырауға бұл жобаны жеке кәсіпкер Антон Скрамовский алып келген. Оның айтуынша, бұған дейін Орал қаласында қолданысқа енгізілген жүйе тиімділігін дәлелдеді. Қазір Батыс Қазақстан облысында емханаға келушілерден арыз-шағымның түсуі 70 пайызға азайыпты.
Жоба жетекшілері электронды кезектің ұялы телефондарға арналған қосымшаларын шығаруды да жоспарға енгізіп отыр.
Бақытгүл БАБАШ,
«Егемен Қазақстан»
АТЫРАУ
