Расында, елімізде халықаралық дәрежедегі үлкен шаралардың алдында қылмыстық ахуал жақсарып сала берді. Әрине, елдегі қылмыспен күрес, қоғамдық тәртіпті жақсарту шаралары бұрын да өз деңгейінде жүргізіліп келе жатқаны аян. Бірақ мәселен, ЭКСПО-2017 халықаралық мамандандырылған көрмесін өткізу кезінде Астанадағы құқықтық тәртіпті қамтамасыз ету барысында қабылданып жатқан шаралар тек елордада ғана емес, тұтас еліміздің қылмыстық ахуалының жақсаруына серпін берді. Сондықтан да, «Қылмыс жасау 16 пайызға азайды. Оларды ашу көрсеткіші 60-тан 70,2 пайызға көтерілді. 26 мың адамға рақымшылық жасалып, 1 200 адам бас бостандығынан айыру орындарынан босатылды», деді Қазақстан Президенті. Міне, бұл құқық қорғау органдарының атқарған жұмыстарының зор екендігін білдіреді.
Елбасы ЭКСПО-2017 халықаралық мамандандырылған көрмесінің ашылуында тиісті қауіпсіздікті қамтамасыз еткені үшін құқық қорғау органдарының барлық қызметкеріне ризашылық білдірді. «Көптеген мемлекеттер басшылары мен қонақтар қатысқан ЭКСПО-2017 көрмесінің ашылуында қауіпсіздікті қамтамасыз еткен еліміздің бүкіл полиция қызметіне, Ұлттық қауіпсіздік комитетіне, «Сырбар» сыртқы барлау қызметіне және басқа да органдарға алғыс айтамын. Біз көрменің ашылуын ұйымшылдықпен өткіздік», деді Мемлекет басшысы. Нұрсұлтан Назарбаев мұндай іс-шараларды өткізу кезінде қауіпсіздікті қамтамасыз етудің айрықша күрделі мәселе екеніне тоқталып, барлық құқық қорғау органдарының жұмысын жоғары бағалады. Дәл қазіргі уақытта елімізде мұндай әлемдік деңгейдегі маңызды мәселелерді көтерген, адамзаттың болашағын алдын ала ойлаған ірі шаралардың біреуі емес, бірнешеуі өтіп жатқаны және өте беретіні белгілі. Онда жаһандық маңызы зор проблемалар шешімін тауып жатыр. Сондықтан да, мұндай ірі шараларды Астанада өткізудің өзіндік орны мен мәні бар. Өйткені, жаһандық жайды жақсартар жақсылықтың негізі Астанадан бастау алып жатқанын әлем біліп отыр. Оның бәрі халқымыздың бірлігі, экономикамыздың жетістігі, адамдардың әл-ауқатының артуы, қоғамдық тыныштық пен бейбіт тұрмыстың арқасында іске асып жатыр.
Ал еліміздің тыныштығын, адамдардың бейбіт тұрмысының бұзылмауын, қоғамдық қауіпсіздікті сақтау тек құқық қорғау органдары қызметкерлерінің ғана жұмысы емес. Ол барша қазақстандықтардың міндеті екені сөзсіз. ЭКСПО-2017 секілді халықаралық көрменің қауіпсіздігін құқық қорғау органдары жоғары деңгейде қамтамасыз етіп жатқанда, мұндай құрметті міндетке еліміздің өзге салалары да бір кісідей атсалысуы керек деп ойлаймыз. Олар да өз қызметтерін осындай жоғары деңгейде орындап, істе адал екендіктерін көрсете білулері керек.
Мемлекет басшысы құқық қорғау органдарының жұмысына текке ризашылық білдірген жоқ. Мемлекеттік қызметтердің бәрі жұдырықтай жұмылып, бірлесе қимылдағанда ғана ортақ міндетті бағындыру оңайға түсетіні сөзсіз. Бұл орайда, «Сырбар» сыртқы барлау мен ішкі істер органдары секілді алдарына қойылған тапсырмаларды нақты орындап жатқандар бар. Олардың өз міндеттерін орындаудағы ерекше істерінен өзге де мемлекеттік қызметтер қалыспаса, Елбасымыз еліміздің алдына қойған сындарлы тапсырмаларды, жаһандық проблемаларды шешуде, адам мен адамзаттың мүддесіне арналған іс-әрекеттерді атқаруда биік деңгейден көріне беретіні анық. Ендеше, жаһанды жақсартар жақсы істерге бастамашы болған Астанамыздың асқақтай беруіне бір кісідей атсалыса берейік, ағайын!
Александр ТАСБОЛАТОВ,
«Егемен Қазақстан»
