Биылғы финалға осы жобаның екі дүркін чемпиондары – қазақстандық «Астана арландары» (2013, 2015) мен кубалық «Куба қабыландары» (2014, 2016) шыққан болатын. Финалдық айқаста екі команда жанкүйерлерге нағыз бокс кешін сыйлады. Кубалық тәжірибелі былғары қолғап шеберлеріне лайықты қарсылық көрсетіп, табандылық танытқан «арландарымыз» жобаның үш дүркін чемпионы атанды.
Кештің шымылдығын 49 кило салмақтағы Теміртас Жүсіпов пен Йоханус Аргилагос ашып берді. Кездесу бастала сала қазақстандық боксшы қарсыласын бет қаратқан жоқ. Жүсіпов қарсыласынан жас жағынан да, тәжірибе жағынан да басым екенін анық байқатты. Ал екінші жекпе-жекке шыққан Ілияс Сүлейменов қазақ жанкүйерлеріне есімі аса танымал емес кубалық боксшы Хавьер Ибаньестен басым түсті. Бірінші раундты бір-бірімен аңдысып өткізген боксшылар, екінші раундтан бастап ширақ қимылдай бастады. Үшінші раундта кубалық боксшы басымдылыққа ие болғандай көрінген. Алайда, Ілияс қарсыласына мұрша берген жоқ. Есеп 3:0.
Үшінші кездесу «арландар» үшін сәтсіз басталды. 91 килодағы Антон Пинчук кубалық Эрисланди Савонға есе жіберсе, Антонның ізін ала 64 кило салмақтағы осы жобаның дебютанты Ділмұрат Мижитовті өте тәжірибелі қарсыласы Энди Круз сәл ғана басымдықпен (1:2) ұтып кетті. Ал алғашқы бестіктің соңғы кездесуінде 75 килодағы тағы бір талантты боксшымыз Аманқұл Әбілхан Рио Олимпиадасының чемпионы Арлен Лопеспен тең дәрежеде жұдырықтасқан еді. Бірақ төрешілер жеңісті бірауыздан (0:3) кубалық боксшыға берді. Сөйтіп, алғашқы бес кездесудің қорытындысы бойынша есеп – 2:3, «қабыландар» алға шықты.
Екінші бестік кездесуі де «арландар» үшін жеңіліспен басталды. Арман Рысбек (81 кг) Рио Олимпиадасының чемпионы Хулио Сезар ла Крузбен жұдырықтасып, 0:3 есебімен жеңіліске ұшырады. Арманның жеңілісі сәтсіздік емес. Кездесуге дейін-ақ бокс мамандары да, жанкүйерлер де Ла Крузды фаворит ретінде санаған еді. Арманнан кейін шаршы алаңға команда капитаны Олжас Сәттібаев пен Йосбани Вейтиа шықты. Жекпе-жектің бірінші раунды кубалық боксшының басымдығымен өтті. Кездесудің қалған бөлігінде Олжас қарсыласы Вейтианы білгенінен жаңылдыруға тырысқан. Әйтсе де, кубалық боксшы Сәттібаевтың ойлағанын жүзеге асыруға мүмкіндік қалдырған жоқ. Жалпы есеп – 2:5.
Финалдық кездесудің ең тартысты жекпе-жегі +91 килодан жоғары салмақта өтті. Осы кездесуде Олжас Боқаев жеңіске жетсе, «арландарға» үміт оты қайта жанар еді. Ал Йоанди Тойрак жеңіске жетсе, кубалықтар мерзімінен бұрын жобаның чемпионы атанады. Жекпе-жек бастала сала «Қазақстан» спорт кешеніне жиналған жанкүйерлер қиқуға салып, Олжастың намысын жани түсті. Боқаевтің өзі де осы кездесуде жеңіске жетпесе, әріптестерінің жеңісі ауа құшатынын сезіп, әр раунд сайын ширақ қимылдап, өзінен 15 кило ауыр қарсыласын жеңуге барын салды. Сөйтіп, Олжас Боқаев тәжірибелі кубалық боксшы Йоанди Тойракты тас-талқан етіп ұтып, командасының жеңіске деген үміт отын қайта жақты. Олжастан кейін шаршы алаңға шыққан Зәкір Сафиуллин (60 кг) мен Асланбек Шымбергенов (69 кг) Олимпиада чемпионы (Лазаро Альварес) мен жүлдегеріне (Иглесиас Сотолонго) еш мүмкіндік берген жоқ. Финалдың негізгі он жекпе-жегінен кейін нәтиже теңесіп, 5:5 есебімен аяқталды.
Негізгі есеп тең аяқталып, таразы басы тең түскен соң жеңімпаз клубты анықтау үшін 52 кило салмақта қосымша кездесу өтті. «Арландар» сапынан сынға түскен 2014 жылғы әскерилер арасындағы әлем чемпионы Олжас Байниязов кубалық қарсыласы Франк Залдиварды қапы қалдырып, командасына өте қиын өткен кездесуде жеңіс сыйлады. Осылайша, «Астана арландары» Дүниежүзілік бокс сериясының (WSB) жетінші маусымдағы жеңімпазы болып ғана қоймай, жобаның үш дүркін чемпионы атанды.
Биылғы финалда чемпион атану үшін «Куба қабыландары» өз елінің бірінші нөмірлі боксшы саналған Иглесиас Сотолонго (69 кг), Арлен Лопес (75 кг) пен Хулио Сесар ла Крус (81 кг) секілді Олимпиада чемпиондарын алып келгенін айта кеткен жөн. Оларға қарсы шыққан еліміздің екінші нөмірлі боксшылары кубалықтардың атақ-даңқтарынан еш қаймыққан жоқ. Бұрын қазақ боксшылары кубалық былғары қолғап шеберлерімен сескеніп, жасқанып жұдырықтасатын. Ал қазір бәрі керісінше. Кубалықтар қазақ боксшыларымен санасып, имене жұдырықтасатын болды. Бұл дегеніміз Куба боксының әлсіреп кеткені емес, қазақ боксшыларының Бостандық аралының боксшыларынан деңгейі жағынан асып түскенін аңғартады.
Әли БИТӨРЕ,
«Егемен Қазақстан»
