– Бұл қойылымды біз бір ай ішінде әзірлеп үлгердік, маңызды музыкалық әрі режиссерлік жұмыс жүріп жатты. Мұны басында өзіме алып тұрып, іштей біраз қобалжыдым, өйткені кез келген жаңа, күрделі партияға тәуекел ету үшін адамға жүрек керек. Сол тұрғыдан келгенде, «бұл менің қолымнан келе қояр ма екен?» деп толқығаным рас. Бірақ бір жағынан, бельканто стилін шыңдап жатырмын деген зор қуанышпен жұмысымды жалғастыра бердім, себебі бұл рөлдің ойдағыдай орындалуы кейінгі басқа спектакльдерге оң ықпалын тигізері сөзсіз. Күндер өте күдік күші бірте-бірте азая берді. Маған мұндағы музыкалық аура қатты әсер етті. Әлемге әйгілі әншілермен бір сапта тұру әнші үшін қандай бақыт екенін өнер адамдары жақсы біледі. Осының бәрі менің сахнадағы жолымды, тынысымды ашты. Актерлік шеберлігімді шыңдадым, нәтижесінде көрерменге жақсы ойын мен техникамды көрсеттім. Әріптестерім мені өте жоғары бағалады, – деді М.Шотабаев Австрия сапары жайында.
Спектакльден кейін солист туралы музыкалық сыншылардың мақаласы жарық көрді. Неміс тілінде шығатын сондай басылымдардың бірі – «Kronen Zeitung» ол жайында: «Қазақстандық жас әнші өзінің сыңғырлаған кең ауқымды даусын, икемді техникасын паш етті» – деп жазды.
Қазақ елінің мәртебесін шынайы өнерімен биіктеткен әнші қай жерде өнер көрсетсе де барлық афишаларда оның есімімен қосарланып «Астана Опера» театры, Қазақстан атауы бірге жүреді екен.
– Бұл сапарда өте көлемді жұмыс атқарылды, күнара ән шырқадым, әрдайым көтеріңкі көңіл күйде болдым. В.Беллинидің «Норма» операсы бельканто стилі үлгісіндегі шыңдардың бірі екенін атап өткен жөн. Спектакльдер арасында Братиславаға барып қайттым, ол жерде Чайковскийдің «Евгений Онегин» операсындағы Ленский партиясын орындадым. Осыдан сахналық мансабым өсті, бұл партияны тағы Бразилияда ұсындым. Көрермендер мен басшылыққа ұнағаны соншалық, мені келесі маусымда Дж.Вердидің «Травиата» операсындағы Альфред партиясын орындауға шақырды, – деп алдағы сапарлары жайында да ойымен бөлісті әнші.
Медет Шотабаевтың шетелге сапары үш айға созылыпты. Ел аралап, алысқа атыңды танытқан жақсы әрине, алайда «өз үйің – өлең төсегің» демекші, сүйікті әншісін қазақстандық жанкүйерлер де әбден сағынып қалған тәрізді. Е.Брусиловскийдің «Қыз Жібек» операсынан сүйікті әншісінің даусын естіген жұрт ерекше толқып, қошеметтеп ұзақ қол соқты. Өйткені, бұл операда Медет Төлегеннің партиясын орындады. Ал тамызда әнші атақты маэстро Пласидо Домингомен бірге Дж.Вердидің «Травиата» спектаклінде өнер көрсетпек.
Қарашаш ТОҚСАНБАЙ,
«Егемен Қазақстан»