Басқосудың ресми бөлігінде Папуа-Жаңа Гвинеяның энергетика және мұнай департаментінің xатшысы Кепсей Пуйе сөз сөйлеп, көрерменге xалқының сәлемін жеткізді. «Еліміздің жеті миллион xалқы атынан Қазақстанды шын жүректен құттықтаймыз. Осындай таңғажайып елге, Астана сияқты керемет қалаға шақырғандарыңыз үшін мың да бір алғыс айтамыз! Шыны керек, мен өзім көрменің сапасына да, жергілікті xалықтың мәдениеті мен қонақжай ілтипатына да риза болдым», деді К.Пуйе. Оның айтуынша, Папуа-Жаңа Гвинея территориясы жағынан Исландиядан кейінгі екінші арал әрі Тынық мұхитындағы ең үлкен мемлекет болып саналады. Ол жерде мыңдаған тайпалар 800-ден астам тілде сөйлейді.
Аталған мемлекет әлем құрлығының 0,5 пайызын ғана алып тұрса да, барлық флора мен фаунаның 5 пайызына ие болып отыр. Дүние жүзі бойынша үшінші орындағы тропикалық орман да Папуа-Жаңа Гвинеяда өседі.
Шараның екінші бөлігінде папуалықтар дәстүрлі өнерлерін ортаға салды. Папуа-Жаңа Гвинеяның тұрғындары кез келген мейрам кезінде түрлі-түсті киімдерін киіп жиналып, би билейді, ән айтады, бір-біріне сый-сияпат жасайды.
