Табиғаттың тылсым сырларының бәрі де адам бойынан көрініс тауып отырады. Кейде кейбір адамдардың болмысынан ақылға сыймайтын, санаға бағынбайтын құбылыстарды да байқап қаламыз. Мұндайда жаратылыстың жұмбағын жанымызбен түсініп, көңілімізбен түйсініп көруге талпынуға тура келеді. Әйтсе де әркім түсініп болмайтын ерекше жағдайлар ел арасында жиі кездеседі.
Айрықша дарынымен елді таңдандырып, халықтың ықыласына ие болғандар көп болмаса да бар. Әрине мұндай жандарға көпшіліктің таңдана әрі қызыға қарайтыны сөзсіз. Тараз қаласында тұратын сегіз жасар Нұрдәулеттің де ешкімде кездесе бермейтін ерекше қабілеті көпті таңдандырмай қоймайды. «Магнит бала» атанып кеткен оның бойында магниттік тартылыс күші бар екен. Темірден жасалған кез келген кішігірім заттарды бала денесіне жақындатқанда, тура бір магнитке қойғандай жабысып қалады. Әуелі ас қасықтарын жабыстырып көрген ол бүгінде ұялы телефон, планшет сияқты заттарды да кеудесінде ұстап тұра береді. Енді табиғаттың мұндай ғажайыбына таңданбасқа амал жоқ.
Нұрдәулет Тараз қаласындағы №29 мектепте оқиды. Биыл екінші сыныпқа көшкен бала әуел бастан-ақ өзінің алғыр әрі зерек екенін байқатыпты. Сабақ үлгерімі де өте жақсы. Баланың алты жасында оянған ерекше қабілетін бірінші болып атасы Арыстанбек байқаған екен. Баланың анасы Аида оның денесіне жабысатын темір құралдарының күн санап артып келе жатқанын, тіпті кейде ол мінген көліктің де жүрмей қалатынын айтады. Әрі күн өткен сайын ешкім түсініп болмайтын қырларының ашылып келе жатқанын әңгімеледі. Дегенмен, зерек әрі ақылды Нұрдәулет ЭКСПО-2017 көрмесін тамашалау үшін Астана қаласына сапарлап кетіпті. Ел мерейін асырған айтулы көрмеге қызығушылық танытып, тамашалауға кеткені де Нұрдәулеттің ойлау қабілетінің ерекшелігін танытса керек.
Қалай болғанда да, баланың бойында бір қасиеттің бары анық. Әйтпесе адамның денесіне темірдің жабысып қалуы сирек құбылыс қой. Бірақ адам баласы өмірде түрлі тылсымдарға куә болады. Өмір барысы күтпеген ғажайыптарды алға тосады. Біз де бүлдіршіннің жолының ашық болуын және өмірде жолының ақ болуын тіледік.
Хамит ЕСАМАН,
«Егемен Қазақстан»
Жамбыл облысы