Күрес
Таиланд астанасы Бангкокта күрес түрлерінен кадеттер арасында Азия чемпионаты аяқталды. Қазақстандық еркін күрес балуандары бір алтын, екі күміс және үш қола медаль иеленді. 69 килода Мейрамбек Сүлейменов Азия чемпионы атанса, 46 килода белдескен Еламан Қадырсейіт пен Ақбар Құрбанов (50 кг) күміс медаль иеленді. Дәулет Теміржанов (54 кило), Дәулет Тәжібай (58 кило), Савет Абылай (85 кило) Азия чемпионатының қола жүлдегері атанды.
Ал қыздар күресінен Марал Тәңірбергенова (38 кг), Аяжан Марқашева (43 кг) және Альбина Қайыргелдинова (63 кг) күміс медаль иеленсе, 40 килода ел намысын қорғаған Айдана Сұлтанова қола жүлдені қанағат тұтты.
Грек-рим күресінің жас балуандары үш алтын, бір күміс медаль жеңіп алды. Еркебұлан Ардақов (46 кг), Рахат Сағымбай (63 кило) мен Дәулет Жалғасов (76 кг) өз салмақтарында Азияның теңдессіз спортшысы атанса, 42 кило салмақта күрескен Ерасыл Мамырбеков күміс медальға ие болды.
Теннис
Астанадағы «Дәулет» ұлттық теннис орталығында теннистен Қазақстан Республикасы Президенті кубогы аяқталды. Халықаралық турнирге биыл алыс-жақын шетелдің 21 елінен келген 200-ден аса әлемнің үздік теннисшілері бағын сынады.
Турнирдің ерлер арасындағы финалдық бәсекеге отандасымыз Михаил Кукушкин мен белоруссиялық теннисші Егор Герасимов шыққан болатын. Үш сетке созылған ойында Егор Герасимов 7:6 (11:9), 4:6, 6:4 есебімен жеңіске жетіп, «Президент кубогы-2017» жарысының жеңімпазы атанды. Айта кетейік, турнирдің финалына шыққаны үшін Кукушкин АТР рейтингінде 16 саты жоғарылап, 102-орынға тұрақтады.
Велоспорт
Велоспорттан «Тур де Франс-2017» велокөпкүндігінің биылғы жарысы өз мәресіне жетті. Франция тасжолдарында өткен жылдың ірі турнирінде Sky командасының британиялық спортшысы Крис Фрум жеңімпаз атанды. Ол қатарынан үшінші, ал жалпы төртінші рет (2013, 2015, 2016, 2017) жеңіске жетіп отыр.
Ал «Астана» велокомандасының капитаны Фабио Ару турнирді бесінші орынмен аяқтады. Қазақстан велоспорт федерациясының президенті Дархан Қалетаев «Астананың» биылғы нәтижесіне көңілі толатынын жеткізді.
Әли БИТӨРЕ,
«Егемен Қазақстан»