Испанияның ең ірі қоғамдық ғылыми-зерттеу институты – (ConsejoSuperiordeInvestiqacionesCientificas (CSIC) ғылыми-зерттеу жөніндегі Жоғарғы кеңесі Webometrics «TRANSPARENT RANKING: Top Universities by Gooqle Scholar Citanions» рейтингісінің қорытындысын жариялады.
Л.Н. Гумилев атындағы Еуразия ұлттық университеті әлемдік білім кеңістігінде бәсекеге қабілетті екендігін тағы да дәлелдеп, әлемдегі үздік 4 982 университет арасында 725-орынға көтерілді. Бұл рейтингке республикамыз бойынша алты жоғары оқу орны қатысқан: екінші орында – Назарбаев Университеті (1 382 орын), үшінші орында Әл-Фараби атындағы Қазақ ұлттық университеті (3 559 орын). Сонымен қатар Қ.Сәтбаев атындағы Қазақ ұлттық техникалық университеті – 4 077 орынды, Қазақ-Британ техникалық университеті – 4 932 орынды, С. Асфендияров атындағы Қазақ ұлттық медициналық университеті 4 961 орынды иеленді.
Еуразия ұлттық университеті Қазақстан мен Орта Азияны былай қойғанда, ТМД елдерінің ЖОО-лары арасында озық жетістікке жетіп отыр. Шетелдік сарапшылардың пікірінше, өте қысқа мерзім ішінде әлемнің ең үздік университтері қатарына еніп, осындай жетістікке жету – нағыз әлемдік феномен және қарқынды түрде алға ілгерілеу. Бұл Л.Н. Гумилев атындағы Еуразия ұлттық университеті ұжымының кәсіби деңгейінің жоғары екенін және жұмысты жұмылып атқарып отырғанын дәлелдейді.
Cондай-ақ ең ірі қоғамдық ғылыми-зерттеу институты – (ConsejoSuperiordeInvestiqacionesCientificas (CSIC) Жоғарғы кеңесі Webometrics Rankingof World Repositories рейтингісінің шығарған қорытындысы бойынша Еуразия ұлттық университеті әлемдік деңгейде 878, Қазақстан бойынша І орын иеленді.
Webometrics рейтингісінде бағалаудың маңызды критерийі – ғаламтор желісінде ұсынылған ғылыми мақалалар, ЖОО ғалымдарының зерттеулері мен олардың дәйексөз көрсеткішінің болуы. Айта кеткен жөн, 2017 жылғы шілдедегі рейтинг бойынша қазақстандық 8 электронды ғылыми мұрағат ұсынылса, қаңтар айындағы көрсеткіш бойынша Л.Н.Гумилев атындағы Еуразия ұлттық университеті әлемдік сатыда 1 973, республика бойынша 4-ші орынға тұрақтаған болатын.
Бүгінде «еуразиялықтардың» электрондық ғылыми мақалаларға ашық қолжетіміділік мүмкіндігімен қамтамасыз ететін Еуразия ұлттық университетінің репозиторий қорында 10 000-нан астам материал бар. Бұл ретте Л.Н. Гумилев атындағы ЕҰУ қазақстандық ЖОО арасында алғаш болып шетелдегідей мақалаларға еркін қолжетімділік мүмкіндігін тәжірибеде қолданып келеді.
