«Нұрлы жол» инфрақұрылымды дамытудың мемлекеттік бағдарламасын іске асырудың бірінші жартыжылдықтағы нәтижелері жөнінде алдымен Ұлттық экономика министрі Т.Сүлейменов баяндады. Министрдің мәлімдеуінше, мемлекеттік бағдарламаны іске асыруға биыл 484,2 млрд теңге қарастырылған. Қаражат көлік-логистикалық және индустриялық инфрақұрылымды дамыту, жылумен, сумен жабдықтау және су тарту, білім беру саласының инфрақұрылымын дамыту, халықаралық қаржы ұйымдарымен жобаларды ортақ қаржыландыру секілді бағыттар бойынша жобаларды іске асыруға бөлінеді.
Ал өз кезегінде Инвестициялар және даму министрі Жеңіс Қасымбек автожол жобаларын іске асыру, көлік-логистикалық әлеуетті дамыту жұмыстары, сондай-ақ, темір жол әрі әуе көліктерінде жүк және жолаушылар ағынын ұлғайту шаралары туралы баяндады. «Нұрлы жол» бағдарламасы аясында инфрақұрылымдық жобаларды кеңінен жүзеге асыру тасымалдардың жылдамдығын ұлғайтуға, көлік шығындарын төмендетуге, транзиттік әлеуетті іске асыру мен сервисті жақсартуға мүмкіндік беретінін атап өтті. Бұл Қазақстанның әлеуметтік-экономикалық дамуына, өнімділік пен іскерлік белсенділіктің артуына оң ықпал етпек.
Отырыста Білім және ғылым министрі Е.Сағадиев, «Самұрық-Қазына» АҚ басқарма төрағасы Ө.Шөкеев, Қаржы вице-министрі Т.Савельева, «Бәйтерек» холдингі төрағасының орынбасары А.Әріпханов, Жамбыл және Ақмола облыстарының әкімдері К.Көкірекбаев пен М.Мырзалин қосымша баяндады.
Мәселені қарау қорытындысында Премьер-Министр Б.Сағынтаев Ұлттық экономика министрлігіне Қаржы министрлігімен және бағдарламалардың әкімшілерімен бірлесіп, бюджеттік қаражаттардың уақтылы орындалуы мен жобалардың іске асырылуын тұрақты бақылауда ұстауды тапсырды.
«Бұл мәселе бойынша толыққанды жұмыстар жүргізілуде. Бірінші жартыжылдықтың қорытындысы бойынша игеру көлемі 99,9 пайызды құрап отыр. Жылдық мәнде – 33,4 пайыз. Дегенмен, негізгі шаралар екінші жартыжылдыққа жоспарланған», деді Үкімет басшысы. Премьер-Министр алдағы уақытта Үкіметті ауқымды жұмыс күтіп тұрғандығын баса айтып, келесі тоқсанда бұл мәселеге тағы да оралатынын ескертті.
Үкіметте қаралған келесі мәселе – ауылшаруашылық өнімдерін қайта өңдеуді дамыту шаралары және Аграрлық қайта өңдеу картасын іске қосу жайы. Бұл ретте Премьер-Министрдің орынбасары – Ауыл шаруашылығы министрі Асқар Мырзахметов Аграрлық қайта өңдеу кәсіпорындарының облыстарда орналасу картасының әзірленген жобасы туралы айтып берді. Бұл жоба аясында қайта өңдеу кәсіпорындарының қазіргі қуаттылықтарын барынша іске қосу, жаңа қайта өңдеу кәсіпорындарын жаңғырту және салу бойынша міндеттерді орындау көзделген.
Ауыл шаруашылығының тиімділігі аграрлық қайта өңдеуге байланысты. Себебі, ол ауылшаруашылық өнімдеріне сұраныс туғызып, оның қосымша құнын арттыра түседі. Осыны баса айтқан вице-премьер аграрлық қайта өңдеуді дамыту экономиканың үшінші жаңғыруы жобалық шеңбері аясында АӨК-тің жалпы өнімінің орташа өсімін 5,3 пайыз көлемінде қамтамасыз ететінін атап өтті. Мұның өзінде ауылшаруашылық өнімдерін қайта өңдеу үдерісі өсімдік шаруашылығы өндірісін 1,4 пайызға, ал мал шаруашылығын 1,2 пайызға арттырмақ. Ал қазір АШМ тарапынан ауылшаруашалық өнімдерін қайта өңдеуді дамытудың әлеуеті мен басымдықтарын анықтау үшін танымал ғалымдар мен қайта өңдеуші кәсіпорындар мамандары, «Атамекен» ҰКП және облыстық әкімдіктер өкілдерінен арнайы жұмыс тобы құрылған.
«Соңғы 4 айдың көлемінде кең ауқымды талдау жұмыстары жүргізіліп, ел аумағындағы барлық дерлік кәсіпорындардың анкеталары жасалып, ағымдағы мүмкіншіліктерін зерттеп, зерделеуден өтті. Осының негізінде олардың өндірістік ахуалы, қуаттылық деңгейі, енгізілу жылы, құрал-жабдық түрі, жүктелім мен шығарылатын өнім көлемі сынды тармақтары көрсетілген мәліметтер базасы әзірленді. Бүгінгі таңда қолда бар мәліметтерге қарағанда, республика бойынша 1 345 белсенді қайта өңдеу кәсіпорны бар», деді А.Мырзахметов.
Аграрлық қайта өңдеуді дамыту бойынша шаралар жүйесі тиісті тараптар тұрғысынан қолдау тауып, құпталған жағдайда Ауыл шаруашылығы министрлігі бекітілген тәртіпке сәйкес АӨК-ті дамытудың 2017-2021 жылдарға арналған мемлекеттік бағдарламасына өзгерістер енгізеді. Қазірдің өзінде «ҚазАгро» мен «Бәйтерек» холдингтері арасында өзара үйлестірілген инвестициялық саясат пен аграрлық қайта өңдеу жобаларын іске асыру бойынша меморандумға қол қойылған.
Бұл мәселе бойынша Үкімет отырысында сонымен қатар «Атамекен» ҰКП төрағасының орынбасары, Қазақстан қаржыгерлері қауымдастығы кеңесінің төрайымы Ю.Якупбаева, «Қазақстан тамақ кәсіпорындары одағы» ЗТБ вице-президенті А.Наурызғалиева, Қарағанды, Алматы облыстарының әкімдері Е.Қошанов, А.Баталов сөз сөйледі.
Қорытындылай келе, Үкімет басшысы Б.Сағынтаев Премьер-Министрдің орынбасары – Ауыл шаруашылығы министрі А.Мырзахметовке «Атамекен» ҰКП, қоғамдық ұйымдардың және тамақ өнеркәсібі қауымдастықтарының ұсыныстарын ескере отырып, Аграрлық қайта өңдеу картасының жобасын пысықтауды тапсырды.
Жиында сондай-ақ, есірткі айналымын бақылау саласындағы заңнамаға түзетулер жобасы қаралды. Осы орайда, Ішкі істер министрі Қ.Қасымов халықаралық тәжірибеге сәйкес, есірткілер айналымын бақылау бойынша БҰҰ халықаралық комитеттерінің ұсыныстары мен Қазақстан Республикасы Конституциялық кеңесінің тұжырымы бойынша тыйым салынған заттардың ұлттық тізімін бекіту туралы шешім қабылданғанын мәлімдеді.
Үкіметтің тиісті актіні қабылдауы елдегі тыйым салынған есірткі құралдарының тізімін нарықта пайда болып жатқан психикалық белсенді заттардың жаңа түрлерімен шұғыл толықтыруға мүмкіндік береді. Бұдан өзге есірткілердің ұлттық тізімі 88 негізгі, әлеуетті қауіпті психикалық белсенді заттармен толықтырылады. Бұл ЕАЭО мемлекеттері мен есірткі айналымын бақылау бойынша БҰҰ халықаралық комитетінің бақылауындағы синтетикалық есірткілердің барлық тізімін қамтуға мүмкіндік жасайды.
Соның нәтижесінде, «Есірткі заттары туралы» заң арқылы тек бақылауға алынған есірткілердің айналымы ғана емес, сонымен қатар болашақта шығуы мүмкін жаңа түрлері де реттелетін болады. Мәселені қарау қорытындысы бойынша «Қазақстан Республикасының кейбір заңнамалық актілеріне есiрткi құралдары, психотроптық заттар, оларға ұқсас заттар және прекурсорлар айналымын бақылау мәселелері бойынша өзгерістер мен толықтырулар енгізу туралы» заң жобасы қолдау тапты және Парламент қарауына жіберіледі.
Динара БІТІК,
«Егемен Қазақстан»