Ұлттық рухымызды сақтай отырып, жаһандық әлемге еркін кіріп, әлемнің ең озық тәжірибелерін қабылдай біліп, жаңа технологияны қолдана білетін мамандар дайындаудамыз. Қажеттіліктен туындайтын латын әліпбиіне көшу жұмысы да бізге жат емес. Заман сынағына лайықты болу үшін қажетті қағиданың бірі. Болашақтың негізі білім ордаларынан бастау алмақ.
«Жаңа гуманитарлық білім» жобасы қолға алынып, әлемнің әртүрлі тілдерінен 100 оқулық қазақ тіліне аударылмақшы, бұның нәтижесінде жаңа сапалық деңгейде білім беріледі. Елбасы сөз еткен «Туған жер» бағдарламасы – жастарды патриотизмге тәрбиелеудің негізгі өзегі. Мақалада ішкі, сыртқы мәдени туризмге көңіл бөлініп, жаһандық ауқымды құндылықтардың тәрбиелік рөлі, қазақстандық заманауи мәдениетті қалыптастыру жолы көрсетілген, нәтижесінде мың жылдық тарихымызда төл мәдениетіміз тұңғыш рет әлемнің барлық құрлықтарына жол тартып, басқа тілдерде сөйлейтін болады, жастар санасына осыны ұғындыра білуіміз керек. Осы өзге тілде сөйлейтін төл мәдениетіміздің аудармасында өз ұлттық кодымызды сақтай білу басты шарт болуға тиіс.
Алдымен жас ұрпаққа ұлттық кодтың мән-мағынасын оның атқарар міндетін қазақ халқымен сабақтастығын жастар санасына ұғындыра білуіміз керек.Жүрегінде патриоттық сезімін оятып ұрпақтан-ұрпаққа жалғасып мирас болып, қанымызға сіңген бабадан қалған ізгі қасиеттерді қайта түлетуіміз үшін жас ұрпақпен қоян-қолтық қатар сіңісе жүріп оның заман талабына сай сұранысына лайық әлем жастарынан ой-өрісінің еш кем еместігін көрсете біліп, оны үнемі ұлттық және жеке байлығын нақты біліп, оны үнемі пайдаланып, соған сәйкес болашағын жоспарлай алуды, ысырапшыл, астамшыл, даңғой болудан бойын аулақ ұстаудың жолдарын үйретуге тиіспіз.
«Қазақстандағы 100 жаңа есім» жобасы жастарға үлгі боларлық, тәуелсіздік жылдарында табысты еңбек еткен нақты адамдардың тағдырлары мен өмірбаяндарын ұсынады, олар телевизиялық деректі туындылардың кейіпкерлеріне айналады. Ұлтымыздың алтын қорына енетін тұлғалар таңдалады. Жаңа жаһандық үрдісте заманға сәйкес жаңғыру – бүгінгі күн талабы. Өмір сүру үшін өзгере білу керектігін жастарға түсіндіру – біздің басты міндетіміз.
Мақаладағы әрбір бағытты басшылыққа ала отырып, жаңа тұрпатты жаңғырудың ең басты шарты халқымыздың ғасырлар бойғы жиған тек қазаққа ғана тән ұлттық өзгешілігімізді сақтай отырып, замана сынынан өткен озық дәстүрлерді жаңғырудың табысты маңызды алғы шарттарына айналдыра білуіміз қажет. Жаңғыру сонымен қатар өткенді толықтай ұмыту емес, қайта ескі мен жаңаның дәуір талабына сай сабақтастығын жалғастыратын ұлт жадының тұғырнамасы екенін өскелең ұрпаққа жеткізе түсіндіру біздің алдымыздағы басты мақсат болуға тиіс.
Ләззат МӘДЕНОВА,
М.Өтемісұлы атындағы Батыс Қазақстан мемлекеттік университетінің аға оқытушысы
ОРАЛ
