Сонымен қатар, аймақтағы аудандардың да орналасқан жеріне, табиғатына және тағы басқа артықшылықтарына қарай жұмыс жоспарлары жүйелі дамып келеді. Ал тоғыз жолдың торабында орналасқан Меркі ауданында бүгінде талай тиянақты тірліктер тындырылып жатқанымен, балық өңдеу цехы жұмысының қарқын алуы өңір халқы үшін айтарлықтай жаңалық болып отыр. Ерекше кәсіптің ел игілігі үшін қолға алынғаны да құптарлық іс.
Негізінен облыста мал және егін шаруашылығы жақсы дамыған. Жыл сайын өңірде аталған салада жақсы көрсеткіштерге қол жеткізіліп келе жатқаны да белгілі. Дегенмен, жұмысын бастап үлгерген балық шаруашылығы өңір халқының қызығушылығын тудырып, кәсіпке деген құрметін арттыра түсетіндігі сөзсіз. Айталық, Талас, Аса өзендерінен, сондай-ақ, Ақкөл, Билікөл секілді көлдерден азын-аулақ балық аулап, халықтың оны күнделікті тіршілікке жаратқаны болмаса, өңірде кәсіби балық шаруашылығы жолға қойылмаған еді. Енді өңір жұртшылығы өңделген балық өнімдерімен қамтылып қана қоймай, алдағы уақыттарда аталған өнімдер экспортқа да шығарылатын болады.
Ағымдағы жылы Меркі ауданы, Андас батыр ауылдық округіне қарасты Гранитогор ауылында балық өңдейтін шағын зауыт құрылысының басталғаны белгілі. Жалпы құны 300 миллион теңгені құрайтын жоба жылына 1500 тонна балық өңдеп, одан 750 тонна дайын өнім шығара алады. Көксеркенің және табанның жон еті, балықтың ұрты мен тартылған етін шығаруды көздеген цехтың негізгі бағыты экспорт болып отыр. Цех алдағы уақыттарда Германия, Дания, Швеция мемлекеттерімен байланыс жасау арқылы өңірде балық шаруашылығын дамытуды көздейді. «Цех жұмысын қолға алудағы мақсат – балық өнімдерін терең өңдеуді жүзеге асыру болып отыр. Қазіргі таңда еліміздегі іргелі балық зауыттарынан мамандар тартылып, жергілікті азаматтарды оқыту үстіндеміз. Бүгінде цехта 15 адам жұмыс істесе, болашақта барлығы 65 адам жұмыспен қамтылатын болады. Кезінде Балқаштың жанында елімізге белгілі балық зауыты болған. Сол жерде кезінде жұмыс істеп, жоғары көрсеткіштерге қол жеткізген Елшібек Ниязбеков, Абзал Әбішев деген азаматтар қазір Меркі ауданында жұмыс істеп жатыр. Келешекте терең өңделген балық өнімдерінің тоқсан пайызы экспортқа шығарылатын болады», дейді аудан әкімі Мейірхан Өмірбеков. Аталған жоба енді бір айдан кейін, яғни тамыз айында толықтай іске қосылады.
Жобаның бүгінгі беталысы жаман емес. Негізгі шикізат көздерін еліміздің Арал, Каспий теңіздері мен Зайсан көлінен әкелеміз деп мақсат қойып отырған цех басшылығы қазіргі кезде Арал теңізінен 40 тонна балық алып, зауытты іске қосу бойынша жұмыстарын жалғастырып келеді. Енді Меркі жерінен Еуропа мемлекеттеріне қарай өңделген балық өнімдері экспортталады. Қазақтың дәмі, табиғи байлығы да алдағы уақыттарда әлемнің алпауыт мемлекеттерін таңдандырады деген сенім бар. Қазірдің өзінде-ақ Германия, Дания, Швеция мемлекеттері бірлесе жұмыс істеуге оң ниет танытып отыр екен. Бұл іс кейінгі кезеңде де Әулиеатаның әлеуетін арттыра түсетін жобалардың бірі болмақ.
Хамит ЕСАМАН,
«Егемен Қазақстан»
Жамбыл облысы