«Жақсыны көрмек үшін» деп жуырда Әлімбай Шерубаевтың ауласын барып көруге де жол түсті. Расында атшаптырымдай кең аула жеміс ағашы мен саялы ағашқа толы екен. Кіреберіс маңда жапырағы жайқалған көктал қою көлеңкесімен бүркеп, шатырлы үйге ыстықты жібермей тұрса, онан бері жағалай біздің өңірге енді жерсіне бастаған оншақты туя ағашы ауланың сәнін кіргізіп тұр.
– Ал мына ағаш – әсем тал деп айтылады екен, ерте көктемде әдемі гүл шығарады да, сонан соң байыз табады. Пілдің құлағындай үлкен жапырақтарын көрдің бе, ауаны желпіп, тазалап тұрады, – дейді бағбандыққа мойын бұрған отағасы.
Өзіміз мекен ететін Сыр өңірі расында шөлейт және жартылай шөлейт аймақ екендігін жасыра алмаймыз ғой, күнінің көзі өткір, шаң суыратын желі де оқтын-оқтын бар екендігін білдіріп қояды. Сондықтан да әр үй иесінің өз ауласына түрлі жеміс пен саялы ағаштар егуі өте қажеттілік деп түсінген жөн. Астана қаласының маңына қаншама гектар жерге түрлі ағаштар отырғызуға пәрмен беріп, жасыл белдеу орнатқызған Президентіміздің игі ісі елге қаншама шарапат шашып тұр емес пе?! Уақыты қанша тығыз болса да, оны назарынан тыс қалдырмаған Елбасы әр өңірдің өсіп өркендеуі жалпы елдің көркеюіне апаратынын әр жиында қадап айтып, атқарушы орындарға тапсырып, елге үлгі көрсетумен келеді. Міне, осы орайда бүгінгі кейіпкеріміздің ісіне сүйсініс білдіреміз. Енді шамалы уақытта жетпіс жастың жалына қол артатын ауылшаруашылық саласының ардагері Әлімбай Шерубаев зейнеткерлікке шықтым деп, төрдің төбесінде шалжиып жатуды әдет қылмаған адам. Таңғы сағат 6-дан орнына тұрады да, бау-бақшасының күтіміне кіріседі. Сонау 9-ға дейін тыным жоқ, ертеңгілік шәйланып алған соң, тағы да кетпен-күрегін алып, қалыпты шаруасына кіріседі. «Жаңа өзің аралап көрген ауладағы 151 ағаш пен 33 атыз жоңышқаны бірсыпыра суару үшін 11 күн уақытым кетеді. Сонда айына үш реттен суарады екенмін. Оның арасында отақ шабу, жетілген жоңышқаны орып жинау секілді шаруаларым бастан асады, – дейді ол шаттана сөйлеп. Міне, сөз басында адам құмартқан ісі қанша ауыр, қиын болса да ләззат алады екен деп жатқандығымыз сондықтан еді.
Әлекеңнің ауласында әлгінде өзіміз тілге тиек еткен ағаш түрлеріне тағы айналып соғар болсақ, 20 түп жүзім биыл алғашқы жемістің нышанын көрсетті. Алманың саны – 24, шабдалы – 2, өрік 8 түп болса, мұнан өзге оншақты түп шие талы бар. Айтпақшы, ауланың сыртқы қабатындағы 14 түп көкжиденің иісі бұрқырап, айналаны көріктендіріп тұрғаны бар. Батыр тұлғалы ағамыздың жеңгемізге деген құрметі де ерекше екен: «Мына гүлдерді Сәуле жеңгең еккен, мына қияр мен қызанақ та сол кісінің еңбегі», деп қояды. Тағы бір атызда қызылша қаптап тұр екен, оны да жеңгеміздің қызметіне жатқызды Әлекең.
Жаңақорғандықтар жақсы біледі кезінде Әлімбай Шерубаев совхозға басшылық жасаған ең жас директордың бірі болды. Небәрі 32 жасында қиыр шеттегі Қаратөбе ауылына, КПСС-тің ХХІV съезі атындағы совхозға директор болып тағайындалды. Жанына білікті мамандар агроном Асан Нақышпанов, гидротехник Әбжаппар Құдайбергенов, мал шаруашылығының бригадирі Құлмағанбет Исаханов сынды жастарды топтастырған директор кеңшарды 1994 жылы 1 млн 200 мың теңге пайдаға шығарды. Онан кейінгі уақыттарда Қыркеңсе ауылында ауыл әкімі, Келінтөбе кооперативінің төрағасы, аудандық жер бөлімінде бас маман қызметтерін атқарған ол 2014 жылы зейнеткерлікке шықты. Сонан бері бау-бақшаның бағбандығымен шұғылданып жүр. Айтпақшы, аудан орталығына орныққан соңғы оншақты жыл көлемінде жас кезіндегі өзі сүйетін волейбол спортына ден қойды. Аудандық ардагерлер командасының белді мүшесі. Жаз айында Алматыға арқалы ақынымыз Олжас Сүлейменов атындағы турнирге қатысып, өзімен де жүздесіп қайтты.
Иә, өмірді мәнді де, мағыналы өткізу әр адамның өз қолында. Соның жарқын үлгісін жаңақорғандық Әлімбай Шерубаевтың өмір жолынан байқар едік.
Нұрмахан ЕЛТАЙ
Қызылорда облысы,
Жаңақорған ауданы
