Мың жасаған шаһардың Оқушылар сарайының жанында аталмыш өзеннің қалаға кірер тұста гүрілдеп, бұлқынып жатуы әдемі өрнек тапқандай екен. Бұрындары мұнда ақсақалдар серуен құрса, енді қалалық ұйымдар бас-көз болып, жазғы каникулда жүрген оқушы балалардың да демалысын сәтті өткізуіне мұрындық болыпты.
Үлкен Алматы өзенінің осы аумағы өзгеріп сала берген. Терек пен қайың құлпырып, ойын алаңдары мен әткеншектер келісті бояуын тапқан. Өзен жағасында жыл санауымыз бойынша он екі тас мәнісін айшықтайды. Биылғы жыл Тауық жылынан басталып, әрбір жылдың бейнесі – өз кейіпкері суреттеледі. Ойын баласы үшін оның мәнін ұғынуға, тастың таңбаларын түсінуге таптырмайтын дүниелер. Тастағы таңбалар жануарлар әлемін таныстыра түседі. Жаратылыстың тылсым әлемін көз алдыңа әкеледі. Тау өзенінің гүрілдеген таңғы сарыны алыстарға кетеді. Балалардың бал күлкісі қаланың мазасыз көліктерінің шуылынан алыс, шалғынды қойнаудан естіледі.Теренкурдегі таңбалы тастар айшықты өрнектерімен балаларды тартымды ойларға жетелейді.
Сапарбай ПАРМАНҚҰЛ,
«Егемен Қазақстан»
АЛМАТЫ
