Бастапқыда раллимен жастық қызығушылықпен айналысып бастаған қос жігіт – Кирилл Черненков пен Алексей Мун аталмыш сайыста 1-орынға қол жеткізіп, жұртшылықты таңғалдырды. Бұдан он жыл бұрын спорттың осы түрімен шұғылданған жігіттер өз қаражаттарына «Ниссан» автокөлігін сатып алып, Маңғыстаудың ойлы-қырлы жерлерінде, Сенек, Ұштаған өңірлеріндегі құмдарға жаттыға бастайды. Әсіресе, «Жібек жолы» сайысына дайындықты бір жыл бойы үзбей аталмыш құмдарда өткізеді. 14 кезеңде 9 мың шақырымды жүріп өтіп, небір табиғаттың тосын мінездеріне тап болған, қиын жерлермен жүріп өткен ақтаулық пилоттар жеңімпаз болғандарына алғашында өзге түгілі, өздері де сенбеген. Ақтаулық 30 жастағы раллишілер енді «Ралли Дакарға» қатысу үшін дайындықты бастап кетті.
Гүлайым ШЫНТЕМІРҚЫЗЫ,
«Егемен Қазақстан»
Маңғыстау облысы
