Салтанатты жиынның ресми бөлімінде Ақпарат және коммуникациялар министрі Дәурен Абаев сөз сөйлеп, ЭКСПО-2017 көрмесінің тақырыбы мен Румынияның көрмеге қатысуы маңызды екенін жеткізді. «Бұл мемлекет халықаралық шараға өте терең тұжырымдама ұсынды, ол – жарық энергиясы», деді министр.
Румынияның сыртқы істер министрі Теодор Мелешкану ЭКСПО-2017 көрмесі адамзат қоғамы қол жеткізген технологиялық даму деңгейін көрсететінін айтты. «Шағын және орта кәсіпкерлікті қосқанда, көптеген экономикалық субъектілерді әртараптандыру және біріктіру тұрғысында «Болашақтың энергиясы» атты ЭКСПО-2017 көрмесі жалпы экономикалық ынтымақтастығымыздағы жаңа сапа деңгейінің негізгі нүктесіне айналары сөзсіз», деді ол.
Мерекеден соң көпшілік Румыния павильонын аралап, экскурсия жасады. Ондағы жәдігерлер мемлекеттің соңғы жарты жылда ашқан өте маңызды жобасы «Экстремалды жарық инфрақұрылымына» байланысты. Ол – прогресс пен ғылыми әлем сабақтастығының символы. Жобаның арқасында болашаққа көз салуға болады. Ядролық физика саласындағы жалпыеуропалық «Элай» деп аталатын кұрылғыны Мажарстан мен Чехия елдері бірлесе отырып әзірлеген. Бұл жоба жүзеге асса, әлемдегі ең күшті лазерге айналады. Ол күн беретін энергияның 10 пайызына тең қуатты түрлендіреді екен. Келушілер осы лазер арқылы өздерінің энергиясымен бөлісе алады. Ал шағын мониторларда сіздің қанша энергия бөлгеніңіз жазулы турады.
Румыниялықтар көрме қонақтарын интерактивті режімде қызықтыруға тырысқан. Мұнда от пен жарық сәулелері көп. Экскурсия жасаушылардың айтуынша, павильонның негізгі мақсаты – графикалық, визуалды құралдардың көмегімен лазерлік техниканың дамығанын көрсету. «Павильонда дүние жүзінде мықты саналатын екі лазер бар. Олардың қуаттылығы күн энергиясының оннан бір пайызына дейін жетеді. Және де бір гамма сәулесі бар. Олардың көмегімен физика саласындағы ғылыми-зерттеу жұмыстарын, мәселен, медицина саласында рак ауруын зерттеуді, оған қарсы күресуді жүргізе алады. Көрмені ұйымдастырушылардың айтуынша, румыниялықтардың павильонын күніне 3 мыңнан 5 мыңға дейін көрермен тамашалайды», дейді павильон аудармашысы Әсел Бөкен.
Ағымдағы жылы Қазақстан мен Румыния дипломатиялық қарым-қатынастың 25 жылдығын атап өтуде.
