Облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Балдай Өтеғалиеваның айтуынша, Еңбек және халықты әлеуметтік қорғау министрлігі мен облыс әкімдігі арасында 27 421 жұмыс орнын құру туралы меморандумға қол қойылған.
– Жыл басынан бері кәсіби оқуға 955 адам жіберілді, – дейді Б.Өтеғалиева. – Қажетті мамандарды дайындау бағытында облыста бірқатар шаралар кәсіптік оқу орындарымен бірігіп жүзеге асырылып келеді. Жұмыс берушілермен келісімшарттар жасақталып, кәсіби мамандыққа оқу курс-
тарына 72 адам жіберілді. Жергілікті және республикалық бюджет қаражаттарынан ұйымдастырылатын әлеуметтік жұмыс орындарымен 506 жұмыссыз қамтылып отыр. Аймақта жастарды жұмыспен қамту мәселесі өзекті. Жоғары және орта-кәсіптік оқу орындарын бітірген жас түлектер үшін ұйымдастырылған жастар тәжірибесіне 316 жас маман жолдама алды. Жастар тәжірибесі бұрын тек қана республикалық бюджеттен бөлінген қаражатқа ұйымдастырылса, облыс әкімінің қолдауымен 2015 жылдан бері жергілікті қазынадан да қаражат қаралып келеді.
Аймақта жұмыспен қамтуға жәрдемдесудің кешенді жоспары аясында әлеуметтік қолдау шараларымен 20 784 адам қамтылады. Жоспарда мемлекеттік бағдарламалар шеңберінде тұрақты жұмыс орындарына орналастыру, кәсіби оқуға жіберу, шағын несие беру, қоғамдық жұмыстарға жолдау, әлеуметтік жұмыстарға орналастыру, жас түлектерді жастар тәжірибесіне жіберу сынды шаралар бар. Бүгінге дейін жоспар 65 пайызға орындалды.
Халықты жұмыспен қамтуда бос жұмыс орындары жәрмеңкесінің маңызы зор. Биылдың өзінде 24 жәрмеңке ұйымдастырылып, 908 адам жұмыс тапты. «Әсіресе алыстағы ауылдарда көшпелі бос жұмыс орындарының жәрмеңкесін өткізу жақсы жолға қойылып келеді. Дамба, Жанбай, Зинеден ауылдарында осындай жәрмеңкелер өткізіліп, 143 адам жұмысқа орналасты», дейді басқарма өкілі.
Мемлекеттік бағдарламалардың маңызы зор
«Нәтижелі жұмыспен қамтуды және жаппай кәсіпкерлікті дамытудың 2017-2020 жылдарға» арналған бағдарламасымен Атырау облысында 7 212 адамды қамту жоспарланып, 2,0 млрд теңге бөлінген. Облыстық жұмыспен қамтуды үйлестіру және әлеуметтік бағдарламалар басқармасының мәліметіне сүйенсек, жыл басынан бері бағдарламамен 9 201 адам қамтылып, есепті кезеңге жоспарланған қаражат толығымен игерілді. Бағдарламаның бірінші бағыты бойынша 250 адамды кәсіптік даярлауға және 500 адамды қысқа мерзімді курстарына оқыту қарастырылды.
Қазіргі уақытта қала мен барлық
аудандарда мобильді топтар құрылып, мамандар қажеттілігі мен оқу орындар тізбесі анықталды. Қысқа мерзімді оқу сәуір айынан басталып, оқуға 521 адам жіберілді. Олар: аспаз, құбыр құрастырушы, аргонмен дәнекерлеуші, автокран жүргізушісі, ағылшын тілі, ЭЕМ операторы, шаштараз, тігінші және т.б. еңбек нарығындағы сұранысқа ие мамандықтар бойынша оқытылып келеді.
Бағдарламаның «Жаппай кәсіпкерлікті дамыту» екінші бағыты шеңберінде
1 233 адамды қамту жоспарланды. 750 адам «Бастау Бизнес» жобасы бойынша кәсіпкерлік негіздеріне оқытылады, 483 адамға микрокредит беріледі. Үшінші бағытпен 5 229 адамды жұмыспен қамту көзделген.
Міндетті әлеуметтік медициналық сақтандыру жүйесі енуіне байланысты халықтың мәртебесін анықтау жұмыстары жүргізілуде. Жасыратыны жоқ, жұмыс істеп жатқан адамдардың міндетті 10 пайыздық зейнетақы төлемдері аударылмайтын фактілер кездеседі. Бұл мекемеде еңбекақы бойынша берешек бар екендігін немесе еңбек шартының жасалмағанын көрсетеді. Мәртебесі анықталмаған азаматтармен жұмыс істеу үшін облыста штаб құрылды. Барлық ауылдық, селолық округтерде «Е-Халық» автоматтандырылған ақпараттық жүйесін енгізу жұмыстары ұйымдастырылуда.
Себепсіз қысқартуға
жол берілмейді
Әлеуметтік жағдайды тұрақтандыру және облыстағы кәсіпорындарда еңбек қатынастарын сақтау үшін бірқатар кешенді шаралар атқарылды. Жұмыстан босатылған қызметкерлер бойынша үнемі мониторинг жұмыстары жүргізіледі.
– Жыл басынан бері облыста жұмыс көлемінің азаюына байланысты 11 мекемеден 219 адам жұмыстан қысқартылды. Жұмыспен қамту орталықтарына 119 адам тіркеліп, толықтай әлеуметтік қолдау шараларымен қамтылды. 88-і өз бетімен жұмысқа орналасты. Қызметкерлердің жұмыстан босатылуына жол бермеу мақсатында облыс әкімдігі 2 539 жұмыс берушілермен және кәсіподақтармен «Өндірістік процестерді тұрақтандыру, қызметкерлердің еңбек құқықтары мен кепілдіктерінің сақталуы, жұмыстан босатылатын қызметкерлерді әлеуметтік қорғау және жұмыспен қамту мәселелері бо-
йынша өзара ынтымақтастық туралы» меморандумға қол қойып, 115,4 мың адамның жұмыс орындары сақталды. Аталған шаралардың нәтижесінде, жұмыс орындары сақталып, қысқартуға жоспарланған 799 адамның 580-і жұмыс орындарында қалдырылды, – дейді облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Балдай Өтеғалиева.
Бақытгүл БАБАШ,
«Егемен Қазақстан»
АТЫРАУ
