Түмен топырағындағы торқалы той

Құрылтайдың эстафетасын әр аудан кезекпен қабылдай­ды екен. Бұл жолы Бердюжье ауданы­ның әкімшілігі мен осында жұ­мыс жасайтын қазақ диаспора өкіл­дігі құшақ жая қарсы алып, ерекше қонақ­жайлылық танытты. Алқалы басқосуда сөй­леген чешендер Түменнің тор­қалы топырағында осымен 21-ші рет өтіп отырған құрыл­тайдың ел мен елді бай­ла­ныстыратын, халық пен халықты жақындастыратын, жас буынды ана тілі мен ұлттық салт-дәс­түрлерін, әдет-ғұрып­тарын ұмыт­пауға, танып-білуге ұмтыл­дыратын игі шара екенін атап көрсетті. Түмен облыстық қазақ ұлттық-мәдени авто­номиясының төрағасы Есімхан Жантасовтың жалынды сөздері жиналғандарды сүттей ұйытты.

– Жат жерде жүрсек те, еш кем­дік көріп отырған жоқ­пыз. Қазақ­станның, Ел­басы Нұрсұлтан Назарбаевтың шетте жүрген ағайындарға жасап отырған жан-жақты қам­қор­лығына шексіз ризамыз. Бұрын жастарымыз ана тілінде сөйлеуге ұялатын. Қазіргі та­лап­тары зор. Біз өз тара­пы­мыз­дан түрлі байқаулар, кон­курс­тар өткізіп, қал-қадірімізше мұрын­дық болып келеміз, – деді ол.

Теріскейлік делегацияны бастап барған облыстық ассамб­леяның хатшылық меңгерушісі Наиль Салимов екі өңірді шекара бөліп тұрғанымен, мәдени-рухани тұтастық тереңде жат­қанын, қай салада болмасын берік ынтымақ орнағанын айта келіп, аймақ басшысы Құмар Ақсақалов беріп жіберген ар­найы сыйлықты салта­натты түрде табыс етті.

Осында «Регион Тюмень» телеарнасының аға редакторы Александр Лищенкомен таныс­тық. Сөйтсе, ол Қазақстанда дүниеге келіпті. Қазақ елі жай­лы айтқан жылы сөздері жаны­мызға май­дай жағып, бардың қадірін біл­мей, парқына жет­пей жүрген жер­лестерімді еске алдым. Саша кішкентай кезі­нен Абайдың өлеңдерін жат­тап, Құрманғазының күй­лерін тыңдап өсіпті. Балалық шағы мұнартып қалған ортасын, құлын-тайдай тебісіп өскен дос­­тарын сағынғаны бірден айтой­лап тұрды. Бірде-бір құрыл­тайдан шет қалмапты.

Түмен төріндегі қазақ тойы­ның ажарын балуандардың күресі, аламан бәйге, дәстүрлі әндер бай­қауы, қыз сыны одан әрі аша түсті.

Жырақта жүрсе де, жүрегі ата­мекен деп соғатын, тілегі де, тілеуі де ортақ ағайын­дарымыздың тұрмыс-тіршілігі­не қанығып қайттық.

Сағындық МАУҒАЗИН,
журналист

Солтүстік Қазақстан облысы