![Межелі міндеттер Үкімет бақылауында](/article_photo/1501641286_article_b.jpeg)
Міндетті медициналық сақтандырудан ешкім шет қалмауы тиіс
Жиында Денсаулық сақтау министрі Елжан Біртанов реформа 1 шілдеде бастау алғанын және қазіргі уақытта Сақтандыру қорына жеке кәсіпкерлердің аударымдары мен жұмыс берушілердің жарналары түсіп жатқанын айтты. Сондай-ақ, жүйе жұмысында болуы мүмкін ақаулардың алдын алу мақсатында МӘМС енгізудің тәуекелдерін басқару бойынша іс-шаралардың кешенді ведомствоаралық жоспары бекітілгенін атап өтті. Жоспар мемлекеттік және жергілікті атқарушы органдардың ақпараттық-түсіндіру жұмыстары, МӘМС жүйесінің қаржылық тұрақтылығын қамтамасыз ету, ақпараттық жүйелер және оларды ықпалдастыру, нормативтік құқықтық актілерді әзірлеу дейтін 4 бөлімнен тұрады.
Министрдің мәліметінше, әрбір тәуекел бойынша оларды жоюға қажетті іс-шаралар анықталған. Ал МӘМС негізгі нормативтік-құқықтық актілері келісуден өтіп жатыр. Бұдан өзге, МӘМС ақпараттық жүйесін құру мақсатында мемлекеттік органдар, Әлеуметтік медициналық сақтандыру қоры және «Азаматтарға арналған үкімет» мемлекеттік корпорациясы бірлескен жұмыс жүргізуде. Салымдарды өздерінің орнына мемлекет төлейтін тұлғаларды есепке алу «Төлемдерді өңдеуді ұйымдастыру» автоматтандырылған жүйесі негізінде 14 санат бойынша жүргізіледі. Оған Еңбек және халықты әлеуметтік қорғау министрлігінің 5 ақпарат жүйесінің мәліметтері мен Ішкі істер, Білім және ғылым және Денсаулық сақтау министрліктері базаларының мәліметтері ықпалдастырылады. Нәтижесінде, барлық ақпарат Денсаулық сақтау министрлігінің «Тіркелген халық тіркелімі» жүйесіне жүктеледі және азаматтардың МӘМС жүйесіндегі мәртебесін анықтау үшін барлық медициналық ұйымдарға қолжетімді болады. Мемлекеттік органдардың ақпараттық базаларынан «түсіп қалуы» мүмкін азаматтар үшін өтініш түрінде ХҚКО арқылы өзінің нақты санатқа жататынын растау мүмкіндігін жасау ұсынылуда. Елжан Біртанов сондай-ақ, МӘМС енгізудің осы кезеңінде Денсаулық сақтау министрлігі, басқа да мүдделі мемлекеттік органдар, облыс әкімдіктері түрлі мақсатты топтармен кеңінен ақпараттық-түсіндіру жұмысы жалғасып жатқанын жеткізді.
Отырыста МӘМС енгізу тақырыбында «Әлеуметтік медициналық сақтандыру қоры» коммерциялық емес акционерлік қоғамы басқармасының төрағасы Е.Бахмутова, Маңғыстау облысының әкімі Е.Тоғжанов, Ақмола облысының әкімі М.Мырзалин және Атырау облысы әкімінің бірінші орынбасары С.Лұқпанов қосымша баяндап, өңірлерде жүзеге асу жайын хабарлады.
Ал мәселені қорытындылау барысында Премьер-Министр Бақытжан Сағынтаев Қазақстанда міндетті әлеуметтік медициналық сақтандыруды енгізуді одан әрі жалғастыру бойынша бірқатар тапсырмалар берді. Үкімет басшысы Денсаулық сақтау, Ақпарат және коммуникациялар министрліктеріне облыстардың, Астана, Алматы қалаларының әкімдіктерімен бірге жұмыс берушілер, кәсіпкерлер және өзін-өзі жұмыспен қамтыған азаматтар арасында ақпараттық-түсіндіру жұмысын жандандыруды тапсырды. Бұдан өзге, Мемлекеттік кірістер комитетімен бірге жұмыс берушілер мен жеке кәсіпкерлердің аударымдары мен жарналарын төлеу бойынша апта сайын мониторинг жүргізу тапсырылды. Сондай-ақ, Премьер-Министр табыстары төмен немесе жоқ азаматтарға баса назар аударуды тапсырды. Оған бейресми сектор жұмысшылары, тіркелмеген жұмыссыздар, мәртебесі жоқ тұлғалар жатады.
Бұл азаматтар міндетті әлеуметтік медициналық сақтандыру жүйесінен тыс қалмауы үшін Еңбек және халықты әлеуметтік қорғау министрлігіне облыстардың, Астана, Алматы қалаларының әкімдерімен бірге бірқатар мәселені пысықтау керек. Мәселен, осындай тұлғаларды олардың жеке мәліметтерін көрсете отырып, сәйкестендіру тетігі, міндетті әлеуметтік медициналық сақтандыру жүйесімен қамту мақсатында оларды жұмыспен қамтамасыз ету шараларын қолға алу қажет. Сондай-ақ, Денсаулық сақтау министрлігіне «Міндетті әлеуметтік медициналық сақтандыру туралы» заңға жақында енгізілген өзгерістерді ескере отырып, ағымдағы жылдың тамызының соңына дейін міндетті әлеуметтік медициналық сақтандырудың нормативтік құқықтық актілерін әзірлеуді жеделдетуді тапсырды.
ҰБТ ойдағыдай өтті
Үкімет отырысында қаралған келесі мәселе – жаңа форматта өткен Ұлттық бірыңғай тестілеу қорытындылары. Бұл ретте Білім және ғылым министрі Ерлан Сағадиев биыл ҰБТ-ның жаңа формат бойынша жүргізілгенін және екі рәсімге, атап айтқанда, мектептердегі бітіру емтихандары секілді қорытынды аттестаттау және ЖОО-ға қабылдау емтиханына бөлінгенін атап өтті. Бұл формат Жапонияның, Израильдің және АҚШ-тың халықаларық тәжірибесін талдау нәтижесінде әзірленген.
«ҰБТ-ның мазмұндық бөлімінде логикалық ойлау деңгейін, базалық құзырлылықты және әрі қарай оқуға деген қабілеттілікті, яғни функциялық сауаттылықты анықтауға бағдарланған тестілер болды. Бұдан өзге, биыл алғаш рет тестілеудің онлайн-таратылымы іске қосылды. Бұл барлық ниет білдіргендерге Қазақстанның кез келген жерінен тестілеу үдерісін бақылауға мүмкіндік берді, сәйкесінше бұзушылықтардың санын төмендетті», деді министр. Жалпы ҰБТ-ға 88 595 адам қатысқан, бұл өтінім бергендердің 95 пайызын құрайды. Тестілеу қорытындысына сәйкес республика бойынша орташа балл 140-тың 80,5-ін құраған. Өткен жылы бұл көрсеткіш 125-тің 81-і болған. 50 балдан тұратын межелік деңгейден 74 517 түлек асты, бұл – қатысушылардың 84 пайызы. Ал кешендік тестілеу 17-23 шілде аралығында жоғары оқу орындарының 48 пунктінде өткен. Оған қатысуға 54 649 өтінім беріліп, іс жүзінде тестілеуге 50 416 адам қатысыпты. 50 балдан тұратын межелік деңгейден 21 078 адам немесе түлектердің жалпы санының 42 пайызынан асқан.
Межелік деңгейден өтпегендер тестілеуден қайтадан өте алады. Құжаттарды қабылдау 1-8 тамыз аралығында, ал тестілеу 19-24 тамыз аралығында өтеді. Межелік деңгейден екінші ретте де өтпей қалған жағдайда ЖОО-ға бір семестрге ақылы негізде оқуға мүмкіндік беріледі.
МӘМС – Ұлт жоспарында көзделген міндет
Үкімет отырысынан кейін баспасөз орталығында Денсаулық сақтау министрі Елжан Біртанов пен «Әлеуметтік медициналық сақтандыру қоры» КЕАҚ басқарма төрайымы Елена Бахмутованың қатысуымен баспасөз мәслихаты өтті. Онда «100 нақты қадам» Ұлт жоспарының іске асырылу барысы туралы айтылды. Ұлт жоспарының негізінде баспасөз мәжілісінде Денсаулық сақтау министрі Елжан Біртанов Қазақстандағы міндетті әлеуметтік медициналық сақтандыру жұмыстары туралы толығырақ айтып өтті. Бұл мәселе Ұлт жоспарының 80-қадамы бойынша жүзеге асырылып жатқаны белгілі. Сонымен қатар, Денсаулық сақтау министрлігі Ұлт жоспарының 81-қадамы – «Жекеменшік медицинаны дамыту, медициналық мекемелерге корпоративтік басқаруды енгізу», 82-қадамы – «Денсаулық сақтау және әлеуметтік даму министрлігі қасынан медициналық қызмет сапасы бойынша бірлескен комиссияны құру» тапсырмалары аясында да ауқымды жұмыстар атқаруда.
МӘМС жүйесіне биылғы жылдың 1 шілдесінен бастап жұмыс берушілер мен жеке кәсіпкерлер қатысып жатыр. Ал алдағы 1 қаңтардан бастап жарналарды төлеуге өзін-өзі жұмыспен қамтыған азаматтар да қосылады, сондай-ақ, мемлекет жарна төлеуден босатылған халықтың 14 санатын, соның ішінде бірінші кезекте халықтың әлеуметтік қорғалмаған тобын сақтандыратын болады. Жалдамалы жұмысшылар жүйеге 2019 жылдың 1 қаңтарынан бастап қосылады. Сонымен қатар, барлық азаматтар сақтандырылғанына немесе сақтандырылмағанына қарамастан, тегін медициналық көмектің кепілдендірілген көлемін алатын болады.
«Қор жеткілікті түрде ауқымды, ол барлық шұғыл әрі жедел медициналық көмектен, онкология, туберкулез, психиатрия және аса қауіпті жұқпалар секілді әлеуметтік маңызы бар ауруларға көмек көрсетуден, сондай-ақ, санитарлық авиациядан тұрады. Бүгінгі таңда тізім бекітілген. Бұдан өзге, барлық азаматтар ауруға қарсы алдын ала егуден өтуге құқылы, сонымен қатар, 2020 жылға дейін барлық өнімсіз өзін-өзі жұмыспен қамтығандар, яғни әлеуетті сақтандырылмайтындардың барлығы амбулаториялық-емханалық көмектің барлық кешенін алып, тегін дәрі-дәрмекпен қамтамасыз етілетін болады. Бұл халықтың барлық тобы медициналық көмек алу кезінде еш шектеу көрмеуі үшін жасалып жатыр», деді Е.Біртанов.
Өз кезегінде «Әлеуметтік медициналық сақтандыру қоры» коммерциялық емес акционерлік қоғамының басқарма төрайымы Елена Бахмутова МӘМС қорын қалыптастыру кезінде неліктен жинақтаушы жүйесі қолданылмайтынын түсіндіріп берді. Е.Бахмутова МӘМС жүйесі жинақтаушы емес екенін және жекелеген адамға жұмсалуы мүмкін нақты ақша сомасымен шектелмегенін мәлімдеді. «Мұнда ынтымақтастық қағидасы қолданылады, яғни жинақтаушы жүйесін қолданған жағдайда, 2 669 теңге көлемінде ай сайынғы аударымды төлеуі тиіс адам жылына шамамен 32 мың теңге жинай алуы мүмкін. Өз кезегінде, асқынбаған босану шамамен 82 мың теңге тұрады, ал айтарлықтай көп таралған қолқа қан тамырын шунттау операциясы шамамен 1,8 млн теңге тұрады. Осылайша, аталған қызметтерге жүгіну үшін жинақтау қорындағы сома жеткіліксіз болар еді», деді Е.Бахмутова.
Осыған орай, оның айтуынша, ынтымақтастық жүйесі адамға өзінің салған жарнасының немесе аударымдарының сомасына қарамастан, өзіне қажетті медициналық көмек көлемін алуға мүмкіндік береді. Айтқандай, медициналық сақтандыру жүйесі туралы азаматтардың ақпараттандырылуын арттыру мақсатында 21 шілдеден бастап мемлекеттік және орыс тілдерінде ыңғайлы интерфейспен және нашар еститін азаматтарға арналған нұсқасымен қордың жаңа веб-сайты іске қосылыпты. Әлеуметтік медициналық сақтандыру жүйесіне қатысты барлық ақпарат сол сайтта топтастырылған.
Динара БІТІК,
«Егемен Қазақстан»