Тәуелсіздіктің алғашқы кезеңдерінде Елбасы Нұрсұлтан Назарбаев еліміздің сыртқы саяси басымдықтарын айқындады. Қазақстан сыртқы саясатының басты ұстанымы тату көршілік қатынас пен өзге мемлекеттің ішкі ісіне араласпау, басқа мемлекеттермен тең құқылық жағдайында түрлі салаларда ынтымақтастықты дамыту, туындаған мәселелердің бәрін бейбіт және дипломатиялық жолмен шешуге ұмтылу қағидаттарына негізделді.
Біз өткен 25 жылда ғасырлар тоғысындағы сындарлы сәттер мен геосаяси қиындықтарға қарамастан, Мемлекет басшысы Н.Ә.Назарбаевтың салиқалы саясатының арқасында өзіміздің ұлттық тәуелсіздігіміз бен территориялық тұтастығымызды толық сақтап қалдық. Сонымен қатар, әлемдік державалардың қауіпсіздік кепілдіктерін алып, өз аймағымызда тату көршілік белдеуін құрдық.
Атомды бейбіт мақсатта пайдалану мақсатында Қазақстан әлемдік қоғамдастық алдында бірқатар маңызды бастамалар көтеріп, олардың орындалуы жолында нақты іс-әрекеттер жасауда. Бүгінде Астана халықаралық антиядролық қозғалыстың көшбасшысы ретінде стратегиялық тұрақтылық пен әділетті әлемді қамтамасыз етуге өз үлесін қосып отыр.
Сонымен қатар, Қазақстанның аймақтағы және әлемдегі саяси, қауіпсіздік, өркениеттік, экономикалық, экологиялық мәселелерге қатысты түрлі бастамалары әлем елдері тарапынан қолдау табуда. Бұл өз кезегінде еліміздің тартымдылығын арттырып, жаһанның жетекші мемлекеттерімен жарасымды ынтымақтастық орната білуіне оң ықпалын тигізуде.
Қазақстанның сырт әлеммен сындарлы қарым-қатынас орната білуі экономикалық әлеуетіміздің артуына, сауда-экономикалық, сондай-ақ, инвестициялық байланыстарымыздың нығаюына жол ашып отыр. Бүгінде әлемдік қоғамдастық біздің елімізді сенімді әріптес ретінде таниды. Мұның бір ғана дәлелі ретінде Қазақстан экономикасына 130 миллиардтан астам АҚШ доллары тартылғанын, азаматтарымыздың 69 елдің аумағына белгілі бір мерзім аралығында визасыз қатынай алатынын айтуымызға болады. Сондай-ақ, Орталық Азияға сырттан келген инвестицияның басым бөлігі, дәлірегі, 80 пайыздан астамы Қазақстанның еншісіне тиіп отырғаны көп жайтты аңғартады.
Қазіргі таңда қай мемлекет болсын инвестициялар мен инновацияларға кеңінен жол ашуға мүдделі. Онсыз ел экономикасының қозғалтқыш күші әлеуетті бола алмайды. Осы орайда істің орайын таба білуде әжептәуір тәжірибе жинақтап, ел игілігі үшін бар ынта-ықыласымен қызмет етіп келе жатқан қазақстандық дипломатия саяси, сауда-экономикалық байланыстарды дамытуды уақыт талабына сай іске асыруда. Әсіресе, отандық дипломатия өзіне жүктелген ауқымды міндеттердің маңыздылығын түсіне отырып, Қазақстанның географиялық орналасуын, Қытай, Ресей және Орталық Азия елдерімен достық қатынастарын тиімді пайдалануда. Сол сияқты, озық технологиялардың қайнар көзі саналатын АҚШ, Жапония, Оңтүстік Корея, Еуропалық одақ елдері бастаған көптеген дамыған мемлекеттердің тың тәжірибелері мен инвестициялық және инновациялық мүмкіндіктерін ел пайдасына асыруда шынайы кәсіби біліктіліктерін көрсетіп келеді.
Жалпы, Қазақстанның әлем елдерімен қарым-қатынастары теңгерімді жағдайда жүзеге асырылып отыр. Бұл ынтымақтастық өңірлік және жаһандық қауіпсіздікті қамтамасыз ету, ядролық қаруды таратпау режімін бекіту, халықаралық терроризм мен экстремизмге қарсы тұру, энергетикалық тепе-теңдікті сақтау мәселелеріндегі өзара тиімді және тең құқылы қарым-қатынасқа негізделген.
Қорыта айтқанда, Президент Нұрсұлтан Назарбаевтың еліміздің тұрақты дамуы үшін жағымды сыртқы ортаны құруды көздеген сындарлы саясатын жүзеге асыруда отандық дипломатия көптеген табыстарға қол жеткізді. Мұны біз аз уақыт ішінде жаңадан қалыптасып қана қоймай, кәсіби жоғары деңгейге көтеріле білген Қазақстан дипломатиясының айтулы жеңісі деп түсінеміз.
Нұрлан СЕЙДІН,
саясаттанушы