![Жарыстар күнделігі](/article_photo/1501644084_article_b.jpeg)
Астаналықтар алда келеді
Өткен аптаның аяғында Коста-Рикада жалауын көтерген «Вуэльта» бәйгесінде «Astana Women’s Team» командасының 22 жастағы шабандозы Арленис Сьерра жеңіске жетті.
Таулы өлкеде ұйымдастырылған жарыстың төрт кезеңнің үшеуінде Арленис Серра жеңіс тұғырына көтеріліп, жеңімпазға берілетін қызғылт түсті майкаға ие болды. Оның командаластары София Беггин мен София Бертиццололар жарыстың көп кезеңдік қорытындысы бойынша 5-ші және 6-шы орынға тұрақтады. Жалпы командалар арасындағы көрсеткіш бойынша «Astana Women’s Team» көш бастап тұр.
Азияның үздігі аталды
Қытайда өткен «Tour of Qinghai Lake» халықаралық веложарысында «Астана Моторс Vino 4ever» велокомандасы «Азияның ең үздік командасы» атағын жеңіп алды.
Команда шабандозы Евгений Гидич жарыстың 13-кезеңінде 2 сағат 13 минут 58 секундтық нәтиже көрсетіп, үздіктер сапынан көрініп, жалпы есепте екінші орынға тұрақтады. Бұл жарыста бақ сынап жатқан 23 команда арасынан «Цинхай Tianyoude» командасы бас жүлдеге лайық деп танылса, астаналықтар үздіктер қатарына ілікті.
Жеңіл атлеттер Лондонда сайысады
Лондон қаласында өтетін XVI әлем чемпионатына әлемнің 205 елінен 2034 жеңіл атлет қатысады деп күтілуде. 2015 жылы Бейжіңде өткен чемпионатқа 207 елден 1936 атлет қатысқан болатын.
Аталмыш әлемдік додада Қазақстан намысын 13 спортшы қорғайды. Олар – Ольга Рыпакова, Мария Овчинникова, Виктория Зябкина, Полина Репина, Георгий Шейко, Регина Рыкова, Диана Айдосова, Елена Наназиашвили, Ольга Сафронова, Юлия Рахманова, Рима Кашафутдинова, Светлана Голендова, Анастасия Тулапина.
Топтаманы әзірлеген Бекен ҚАЙРАТҰЛЫ,
«Егемен Қазақстан»