Цинхай провинциясы Куньлунь шыңында орналасқан. Ауданы 720 шаршы шақырымға созылған аймақ табиғи байлығымен және тамаша мәдениетімен танымал. «Соңғы он жыл ішінде Цинхай ресурстарды игеру есебінен ерекше салаларды дамытуда. Жалпы, ұлттық өнімнің үздіксіз өсу қарқыны 10 пайыздан асады. Экономикалық қуаттылығы, химия өнеркәсібі едәуір өскен, бұл мұнай және табиғи газ, тауларда өсетін өсімдік шаруашылығы, мал шаруашылығы және басқа да салалардың ілгерілегенін аңғартады.
Қытай және тибет дәрілері, ұлттық киім мен әшекейлер, сондай-ақ, өңдеу өнеркәсібі жақсы дамуда. Гидроэнергетика, жел энергетикасы, газ гидраттары және басқа да экологиялық таза энергия ресурстарын игеру және пайдалану айрықша қарқынмен алға жылжуда», дейді «XiNing Moonlight PV Technology» компаниясының бас директоры Хао Ионг. Ол әлемдік нарықта жетекші орын алатын күн панельдерін жеткізу бойынша Қазақстанмен әріптестікті реттеу мақсатында келгенін де жасырмады.
«Біз Астанадағы ЭКСПО-2017 көрмесінде өтіп жатқан Цинхай провинциясының аптасына қатысып, Қазақстанның нарығын зерттеп, зерделеуді мақсат еттік. Күн панельдерін шығарумен айналысатын компаниямыз мұндағы әріптестермен жұмыс жасауға дайын. Қазақстан – біз үшін өте үлкен нарық. Өнімдеріміз инновациялық технологиялармен және бағасымен ерекшеленеді. Олардың әрбір бөлшектері толық пысықталып, Цинхай провинциясында да, жалпы Қытайда да белсенді сатылуда. Біз Африка, Ирак, Пәкістан сияқты елдермен жұмыс жасаймыз. Енді «Бір белдеу, бір жол» бағдарламасы мен ЭКСПО көрмесінің арқасында Қазақстан нарығына да шығатынымызға сенеміз», деді бас директор.
Асхат Райқұл,
"Егемен Қазақстан"
