Жаңа балабақша ашылды

Облыс орталығындағы Құр­мыш ша­ғын ауданында №43 «Гүл­дәурен» бала­бақ­­ша­сы пай­да­лануға берілді. Жаңа ба­ла­­бақ­ша­ның ашылу рәсіміне облыс әкімі Архимед Мұхамбетов, қала әкімі Нұр­мұ­хамбет Әбдібеков, ата-аналар қатыс­ты. Жалпы аумағы 11 209 шаршы метр бо­латын балабақ­шада 320 бүлдіршін тәр­бие­ле­нетін бо­ла­ды. Үш қабатты, заманауи талаптарға сай жабдық­тал­ған ғим­а­рат­та 16 ойын бөл­мелері, 3 оқу сы­ныптары, гим­настика, му­­зыка, бейнелеу өнері зал­да­ры және басқа да тұрмыстық-қыз­мет­тік бөлмелер бар. Жобалануы жа­ғы­нан елімізде балама­сы жоқ бала­бақ­ша құ­ры­лысына 515 646,66 мың теңге жұм­сал­ған. Ау­ла­дағы 16 ойын алаңына күр­ке­лер орнатылған. Барлық алаңдарға құм төгіліп, сырғанау төбелері­мен, әт­кен­шек­термен жабдық­тал­ған. Енді мұн­да сауық­тырудың тиімді әдісі — галотерапия енгізу жоспарланып отырған көрінеді. – Қазір облысымызда 501 балабақша жұмыс істейді. Бұған 35 мыңнан астам бүлдіршін ба­рып жүр. Аудандардағы бала­­лар­дың 90 проценті мектепке дейінгі балалар мекемелерімен қамтама­сыз етілген. Облыс орталығында бұл мәселе өзекті болып қалуда. Қазір Ақтөбе қаласында 12 мың бүлдіршін балабақша кезегінде тұр. Соңғы жылдары «Балапан» республикалық бағдарламасы ая­сын­да 400-ден астам мектепке дейінгі мекеме ашылып, бүлдіршін­дерді қабыл­да­ды. Әсіресе, жеке­нің қолындағы бала­бақшалар мем­лекеттік-коммуналдық мен­шікке қайтарылуда. Мысалы, бұ­рынғы үш балабақшаның ғима­рат­тары қайтадан өңделіп, 240 орындық №37 «Балапан» мектепке дейінгі ұйымы, 280 орындық №38 «Әлем» және 280 орын­дық «Дос­тық» балабақшалары ашыл­ды. «Оңтүстік Батыс-1» шағын ау­данында, Сәңкібай батыр даң­ғы­лы бойынан және Жаңа қоныс поселкесінде балабақшалар са­лыну­да. Жақында 12 шағын ауданда балабақша құрылысы басталады. Бүгін тағы бір балабақша пай­да­лануға беріліп отыр. Жалпы 2012-2014 жылдары бұл ба­ғыттағы көрсеткішіміз біраз жақ­са­ра­ды,– деді облыс әкімі Архимед Мұ­хам­бетов салтанатты сәтке жинал­ған­дарға. Одан кейін балабақша құры­лы­сын сал­ған «Промресурс» ЖШС директоры Олег Федоров сим­во­ликалық кілтті №43 «Гүл­дәурен» балабақшасының меңге­ру­шісі Ба­қыт­гүл Жетесоваға тап­сыр­ды. Ата-аналар атынан сөз ал­ған Сәрсеәлі Қалтаев жаңа ба­ла­бақ­шаның ашы­луы­мен құттықтады. Сатыбалды СӘУІРБАЙ. Ақтөбе облысы.