Енді міне, өңірдің аудан орталықтарында да осындай субұрқақтар іске қосылып, жұрт баратын демалыс орындарының қатары көбейіп келеді. Жақында осындай түрлі-түсті субұрқақ Жарма ауданының орталығы – Қалбатау ауылындағы орталық алаңда елді мекен тұрғындарының, жастардың қатысуымен салтанатты түрде ашылды. Ауылдағы ағайынның көңілін серпілткен шараға аудан әкімі Нұрлан Сыдықов та арнайы қатысып, елді мекенге ерекше көрік берген субұрқақты жұртпен бірге тамашалады.
«Ауылымыздың көркін кіргізіп, ажарына ажар қосқан бұл нысан жергілікті тұрғындарға ғана емес, ауданға келетін қонақтарға да ерекше әсер сыйлайды деп ойлаймыз. Әсіресе, біз секілді жастар үшін ауданымызда осындай демалыс орындарының көп болғаны қуантады», деді субұрқақтың ашылу салтанатында жастар атынан сөз алған «Жас Отан» Жастар қанатының белсенді мүшесі Махаббат Санат.
Әуенді субұрқақ екі тостағаннан тұрады. Үлкенінің диаметрі 20 метрді құрайды. 200 су бүріккіштен тұратын субұрқақ 12 метр биіктікке дейін су шашатын көрінеді.
Азамат ҚАСЫМ,
«Егемен Қазақстан»
Шығыс Қазақстан облысы,
Жарма ауданы
