Елбасы Нұрсұлтан Назарбаев Қазақстан халқына арналған «Нұрлы жол – болашаққа бастар жол» атты Жолдауында жол – экономикалық дамудың күретамыры екендігін тағы да еске салған еді. «Елдің өркенін білгің келсе, жолына қара» деген қағида қалыптасқан. Барыс-келіс пен алыс-берісте жол қатынасы айрықша маңызға ие. Көне замандарда ірі қалаларымыздың көбі Ұлы Жібек жолын жағалай қоныс тепкен» дей келіп, бүгінгі бәсекеге құрылған нарық заманында да жолдың маңызы ерекше екендігін, «жол − шын мәнінде өмірдің өзегі, бақуатты тірліктің қайнар көзі. Барлық аймақтар темір жолмен, тас жолмен, әуе жолымен өзара тығыз байланысуы керектігін», айтады. Сондықтан Елбасы жолдардың сапасын көтеруді, оның бойындағы логистикалық қызметтерді дамытуды үнемі тапсырып отырады. Қостанайда өткен семинарда жол сапасын көтеруге арналды. Инвестициялық жобаны дайындау жұмыстарына қатысып отырған Қазақстан жол ғылыми-зерттеу институты республикалық маңызы бар жолдарды жөндеу мен күтіп ұстаудың озық әдістерін өндіріске енгізуді ұсынды.
– Республикалық маңызы бар жолдарды күтіп-баптаудың біз ұсынып отырған әдістемесі АҚШ-та, Еуропаның бірқатар дамыған елдерінде пайдаланылады. Осы әдістемені пайдаланатын жоба жүзеге асырылғанда жолдың күтіміне бөлінетін қаржы 22 пайызға дейін үнемделеді. Озық тәжірибені алдымен Қостанай облысындағы республикалық маңызы бар жолдарды жөндеу, күту жұмыстарына енгіземіз, – дейді «Қазақстан жол ғылыми-зерттеу институты» АҚ вице-президенті Ербол Айтбаев.
Ұсынып отырған әдістемесін жасау үшін ғылыми-зерттеу институтының жол сынау және жылжымалы жол диагностикалау зертханалары Қостанай облысындағы 1409 шақырымға созылатын республикалық маңызы бар жолдарды тегіс жүріп өтіп, қажетті мәліметтердің барлығын жинады. Зертханалардағы заманауи құралдар арқылы жолдардың қозғалыс қарқындылығы есепке алынады, көпірлер мен су өткізу құбырларын инвентаризациялау және диагностикалау, автомобиль жолдарын паспорттау жүзеге асырылады, жол ақаулары туралы мәліметтер жиналып, өңделеді, жол жамыл-
ғысының серпінділік модулі, жамылғының ілінісу қасиеті, жалпы тас жолдардың бүгінгі жағдайы бүге-шігесіне дейін анықталады. Семинарда мердігер компаниялар өкілдеріне қанатқақты жобаның осындай жұмыстары таныстырылып, түсіндірілді, мүдделі жақ тараптары талқылады.
Қазақстан жол ғылыми-зерттеу институты бүгінде жолдардың жағдайына қатысты жылжымалы кешенді зертхана жинаған қажетті мәліметтердің барлығын өңдеп, жөндеу, күту жұмыстарының сметалық құнын дайындау үстінде. Жоба бойынша республикалық маңызды жол көлемінің 700 шақырымын тендер арқылы алатын мердігер компаниялар келесі жылдың басынан бастап, жөндеуге, күту жұмыстарын жүргізуге кіріседі.
– «Автомобиль жолдарын күтіп-баптау тұрақтылығы» жобасы сегіз жылға арналған. Жоба бойынша мердігер компаниялар үш жыл жолды жөндеп, қалған бес жылда оның күтімін жүзеге асырады. Бұл жоба жолдың сапалы жасалуына да, күтіміне де, сонымен қатар мердігер компаниялардың алаңсыз жұмыс істеуіне де тиімді болады, – дейді «ҚазАвтоЖол» АҚ Қостанай облыстық филиалы директорының орынбасары Нұрбек Темірханов.
«ҚазжолҒЗИ» АҚ қызметкерлері семинарға қатысушыларға жылжымалы жол зертханалары мен құрылғылардың жұмысын көрсетіп, таныстырды.
Нәзира ЖӘРІМБЕТ,
«Егемен Қазақстан»
ҚОСТАНАЙ
