Айдын иелері алғашқы болып гол жіберіп алды. Қонақтардың шабуылшысы Дмитрий Жукенов матчтың 23 секундында қақпашымызды қапы қалдырып, есеп ашты. Дегенмен, жылдам соғылған гол «Барысты» есеңгірете алмады. Арада небәрі алты минут өткенде елордалық хоккейшілер екі бірдей шайба салып, алға шықты. Команда құрамына жаңадан қосылған ойыншылар Линден Вей мен Дмитрий Шевченко мергендіктерімен көзге түскен еді.
Екінші тайм бастала салысымен «Барыстың» шабуылшысы Кевин Даллман омбылық клубтың қақпасынан саңылау тауып, есепті 3:1-ге жеткізді. Бұл нәтиже екінші таймның орта тұсына дейін өзгермей тұрған. Бірақ, үсті-үстіне шабуылдаған қонақтар ақыры дегеніне жетті. Кездесудің 28-минутында Никита Лисов біздің қақпашы Хенрик Карллсон қорғаған қақпаның құлпын бұзды.
Ойынның соңғы бөлігінде «Барыс» сапындағы легионер Найджел Доус төртінші шайбаны соғып, команданың басымдығын нығайтып берген еді. Ал матчтың аяқталуына аз ғана уақыт қалғанда Қазақстан хоккей мектебінің түлегі, қазіргі уақытта «Авангардтың» сапында өнер көрсетіп жүрген Семен Кошелев есептегі айырмашылықты қысқартып кетті. Дегенмен, бұл шайба матчта соғылған соңғы гол еді. Сөйтіп, «Барыс» 4:3 есебімен басым түсіп, осы турнирдегі екінші жеңісіне қол жеткізді.
Сондай-ақ, бұл турда Швейцарияның «Давос» командасы «Адмиралды» (Владивосток) 4:0 есебімен тізе бүктірді. Кеше кешкісін мұз үстінде «Авангард» - «Нефтехимик» және «Давос» - «Трактор» командалары өзара жұп құрап, тартысқа түсті.
Ал «Барыс» хоккейшілері бүгін турнирдегі кезекті ойынын Челябинскінің «Тракторымен» өткізеді.
Қайрат ЖҮНІСҰЛЫ,
«Егемен Қазақстан»