Ерлер денсаулығына ерекше назар қажет

Бұрнағы күні Астанадағы Ұлттық баспасөз клубында елі­міз­дің бас урологы Мырзакәрім Алшынбаев, медицина ғылым­дары­ның докторы, кардиолог Дулат Полымбетов, Алматы дәрігерлер білімдерін жетілдіру институты эндокринология кафедрасының профессоры Михаил Зельцер Астана қала­сындағы респуб­лика­лық диагностикалық орталықта өтіп жатқан «Ерлер денсау­лығы күндері» шарасы аясында баспасөз мәслихатын өткізді. «Ерлер денсаулығы күндері» іс-шарасы аясында ерлер мен ұл балалар урологиялық, жүрек-қан тамырлары және эндокринологиялық аурулар бойынша Астанадағы республикалық диагностикалық орта­лық­та аталмыш профессорлардан тегін кеңестер алуда. Шара ел Үкі­меті­нің бас­ты мәселелерінің бірі – халықтың өмірін ұзартуға байланысты өткізі­ліп отыр. Өкінішке орай, ел аумағындағы ерлер орташа есеппен әйел­дер­ге қарағанда 12 жылға қысқа өмір сүретін көрінеді. Бұл көбі­не­се, сыр­қат ер адамдардың медицина көмегіне өте кеш жүгіне­тінінің нә­ти­же­сі екенін айтқан жөн. Яғни, заманауи диагностика арқылы ауруын анықтап, өмір сапасын жақсартуға еркектердің өзі құлықсыз көрінеді, иә, ер азаматтар ауруларын әбден асқынтып, соңғы стадия­сында келіп, әбден титықтағанша жүре береді. Мырзакәрім Алшын­баевтың пікірінше, медициналық көмек мәселесіне келгенде еліміздегі еркектер пси­хологиясын түбегейлі өзгертуіміз керек көрінеді. «Мемлекетімізде ана мен бала денсаулығын қолдауға бағытталған көптеген мемлекеттік бағ­дарламалар бар да, ерлер денсаулығына байланысты бір де бір бағ­дар­лама қабылданбаған. Барлығына келгенде қаржы табылады, ал еркектер денсаулығына қаражат бөлмейді. Бұл мәселені біз 2008 жылдан бері көтеріп келеміз, әзірше сеңнің бұзылатын түрі жоқ», – дейді профессор. Урология ғылыми орталығы Қазақстанның барлық аумақ­тарын­да өткізілген іс-шараларды қорытындылай келе, ерлер арасында эрек­тильді дисфункцияның, аденома, простатит, бүйрек тастары ауру­лары көп таралғанын анықтап отыр. Сонымен қатар, табиғи заңдылықтар мен ауа-райын байланысты оңтүстік және батыс ай­мақ­тарда өмір сүретін ерлер арасында бүйрек пен бүйрек тастары секілді ауру түрлері көп таралса, солтүстік пен шығыс аймақ­тардағы салқын ауа-райының әсерінен оларда қабыну аурулары жиі кездеседі екен. Баспасөз мәслихатында медициналық көмекке ерте жүгіну жөнінде ерлер арасында ағартушылық жұмыстарын өткізу қажеттілігі кө­терілді. Сонымен қатар, мәслихатты ұйымдастырушылар болашақта елордада ерлер денсаулығын қарайтын, жүрек-қан тамырлары, урология және басқа да ер адамдар жиі шалдығатын ауру түрлерін емдейтін әмбебап орталық ашу туралы жоспарларымен бөлісті. Венера ТҮГЕЛБАЙ.