– Телехикаяның халықты баурап алуының басты себебі де осы, – дейді әртіс Нуреттин Сонмез көпшілікпен жүздесу кезінде. − Расында, көшпенді өмірдің суреттелуі, көшпелі мәдениет декорациясының қанық бояумен берілуі, тіпті кейбір кадрлардан, киіз үй мен төсеніш текеметтерінен қазақы қошқар мүйіз оюларды байқайсыз.
Телехикаяның режиссері Мехмет Боздогтің айтуына қарағанда, фильм Осман империясының құрылар дәуірін баяндайды. Туындыны меншік иесі ретінде өндіріске шығарған Кемал Текденнің «Tekden Film» студиясы. Сериал көрерменге бір демде ұнады. Тіпті түсірілім алаңына президент Режеп Тайип Ердоғанның өзі келіп, сәттілік тілеген.
«Киноның бас кейіпкері Ертұғырыл Оғыз тайпасының Бозоқ қанатынан тарайтын Қайы руының көсемі. Атақты Османлы империясының негізін қалаушы Османның әкесі. Империяны 623 жыл билеген әулет осы кісінің ұрпақтары. Сондықтан да ғаламға алты ғасырдан астам үстемдік жүргізген бабаларымыздың батырлық тарихын сомдауға кірістік», дейді екінші қонақ Женгиз Жошкун мырза.
Кездесудің ресми бөлігі аяқталған соң әртістер Нуреттин Сонмез бен Женгиз Жошкун көрермендер тарапынан қойылған сұрақтарға жауап берді. Әуелі өздерінің қазақ жұрты мен топырағына қауышқан сәтін бақытқа балайтынын айта отырып, бұл туынды тек түріктің ғана емес, күллі түркі жұртының тарихы, біз бен сіздің ерлік дәуіріндегі ортақ рухымыз тоғысып жатқан дүние дегенді жеткізді.
«Телехикаяның түсірілу жұмыстары қалай жүріп жатыр?» деген көрермен сұрағына: «Қазір фильмнің 4-ші маусым жұмыстары жүріп жатыр. Өкінішке қарай, әлі де машақаттар баршылық. Мініс аттары жарамай қалуы, өздеріңіз кинодан көргендей киіз үйлердің жел-құзға төтеп беруі сияқты ағымдағы шаруалардан бастап қиындықтар көп. Бірақ біз мұның бәрін еңсереміз», деді мәртебелі қонақ.
Бекен Қайратұлы,
«Егемен Қазақстан»
Суретті түсірген
Орынбай Балмұрат,
«Егемен Қазақстан»
