Қазақстан БҰҰ-ға тек әлемдік қоғамдастықтың жаңа мүшесі ретінде ғана емес, халықаралық қатынастардың өзекті мәселелері бойынша белсенді ұстанымы танылған, ядролық қарусыздану үшін қозғалыстың алдыңғы қатарында тұрған мемлекет ретінде кірді. БҰҰ жұмысына қатысу кезінде Қазақстан халықаралық қоғамдастыққа табысты түрде интеграцияланып қана қоймай, лайықты орынға ие бола алды.
БҰҰ-да Қазақстанның қарусыздану және ядролық қаруды таратпау саласындағы белсенді рөлі әрі біздің мемлекеттің осы саладағы барлық қол қойған халықаралық келісімдерін ұстанатындығы мойындалған. БҰҰ-ның мінберінен біздің мемлекеттің көптеген халықаралық бастамалары ұсынылып, қазіргі таңда олар табысты түрде жүзеге асырылуда. Халықаралық қауымдастық Қазақстанның ядросыз таңдауын жоғары бағалап, құрметтейді. Қазақстанның ядролық сынақтарды тоқтату ісіндегі үлесі жалпыға белгілі болғанымен, Қазақстанның басшылығы өзінің міндетін аяқталды деп есептемейді.
Қазақстан 2017-2018 жылдары БҰҰ-ның Қауіпсіздік Кеңесінің тұрақты емес мүшесі ретінде халықаралық қауіпсіздіктің жаһандық күн тәртібіне маңызды үлес қосуда.
Қазақстан Республикасының БҰҰ-ның Қауіпсіздік Кеңесіндегі қызметі басымдықтарының тұжырымдық негізінде – Қазақстан Президенті Нұрсұлтан Назарбаевтың БҰҰ-ның Бас Ассамблеясының 70-ші сессиясындағы сөйлеген сөзі, Манифест. «Әлем. ХХІ ғасыр» және басқа да соғысқа қарсы, ядролық қаруға қарсы және лаңкестікке қарсы бастамалары жатыр. Бұл бастамалар елдің халықаралық бейбіт және қауіпсіздікті нығайтудағы күш-жігерінің негізі болып табылады әрі оның әлемдік қоғамдастықтағы сенімді серіктес ретіндегі беделін дәлелдейді.
Қазақстан жаһандық және трансұлттық қауіпсіздіктің аса маңыздылығын ескере отырып, БҰҰ-ның Қауіпсіздік Кеңесіндегі қызметінің басымдықтарын халықаралық ынтымақтастықтың төрт саласына: ядролық қауіпсіздік, энергетикалық қауіпсіздік, азық-түлік қауіпсіздігі және су қауіпсіздігіне көңіл бөлу негізінде қалыптастырды.
Қазақстан жаһандық ядролық қауіпсіздікті нығайтуды дәйекті түрде жалғастыруда және ядролық қауіпсіздіктің жалғыз ғана кепілі болатын толық, сондай-ақ, жалпылай ядролық қарусыздану идеясын ұстанып келеді. 2009 жылы Қазақстанның бастамасымен бекітілген 29 тамыз ядролық сынақтарға қарсы әрекет ету Халықарлық күні БҰҰ-ның, әлем елдерінің, үкіметаралық және үкіметтік емес ұйымдардың ядролық сынақтарды тоқтату ісінде ерік-жігерін арттыруға бағытталған.
Біздің еліміз жаһандық энергетикалық инфрақұрылымның басты элементі екендігін де ұмытпауымыз керек. Энергетикалық қауіпсіздік саласы бойынша Қазақстан дәстүрлі және баламалы энергетиканы алға жылжыту үдерісінің белсенді қатысушы ретінде өзін таныта білді. Қазақстанның бастамаларын айта отырып, ХХІ ғасырда тұрақты дамудың Жаһандық энерго-экологиялық стратегиясын, Еуразияның Энергетикалық стратегиясын айтпай кету мүмкін емес. Баламалы энергетиканы дамыту саласында Қазақстанның көлемді экологиялық бастамасы – «Жасыл көпір» бастамасын ұсынуы да айтарлықтай жетістік. Астанада «Болашақтың энергиясы» тақырыбындағы ЭКСПО-2017 халықаралық көрмесі де табысты өтіп жатыр.
Қазіргі таңда сумен қамтамасыз ету және трансшекаралық өзендердің су ресурстарын бірлесе пайдалану Орталық Азия елдерінің алдында тұрған өзекті мәселелер. Су қауіпсіздігі саласында Қазақстан Республикасы Орталық Азия мемлекеттерінің күштерін су-энергетикалық ресурстарды бірлесе тиімді пайдалану төңірегінде жұмылдыру бойынша саясат жүргізуде. Қазіргі кезде аймақтың гидроэнергетикалық әлеуетін тиімді пайдалану тетіктерін құру мәселесіне үлкен көңіл бөлінуде.
Азық-түлік қауіпсіздігін қамтамасыз ету саласында Қазақстан бидай мен ұнның ірі экспорттаушысы бола отырып, азық-түлік қауіпсіздігімен байланысты мәселелерді шешуге мүмкіндік беретін ұстанымға берік екендігін жария етті. Аштықпен күресу бойынша ұсыныстары Қауіпсіздік Кеңесі шеңберінде әлемдік деңгейге көтерілетіндігіне күмәніміз жоқ.
Аймақтық қауіпсіздік мәселелерін шешуге қатыса отырып, Қазақстан Ауған жерінде бейбітшілік пен келісімді орнату үшін талай іс тындырды. Ауғанстандағы жағдайды реттеудегі Қазақстанның үлесін ескеріп, елімізге Қауіпсіздік Кеңесіндегі Ауғанстан/Талибан бойынша комитетке төрағалық ету тапсырылды. Сонымен қатар, Қазақстан БҰҰ-ның Қауіпсіздік Кеңесінде ИГИЛ/ДАИШ/Әл-Каида және Сомали/Эритрея бойынша комитеттерде төрағалық етеді.
БҰҰ-ның Қауіпсіздік Кеңесіндегі мүшелігі Қазақстанның БҰҰ-ның бітімгершілік операцияларына қатысу белсенділігін арттыру және ұйымның бітімгершілік әлеуетін нығайту үшін де пайдаланылады. «Қазбат» БҰҰ-ның басшылығымен жүргізіліп жатқан әскери қақтығыстар аймағындағы бітімгершілік миссияларына қатысуға дайындалуда.
Қазақстан өзін көпжақты дипломатияда тиімді тепе-теңдікті және бейтараптылықты ұстай алатын көзқарасы бар адал әрі әділ серіктес екендігін көрсетті. Қазірде республика міндет ретінде алған әртүрлі аспектілерде бітімгершілік миссияларын жүзеге асырумен айналысуда, халықаралық қақтығыстар мен дағдарыстарды реттеу мәселелеріне барынша үлес қосуда. Біздің мемлекеттің қақтығыстарды реттеу бойынша белсенді саясатының дәлелді айғағы, Сириядағы атысты тоқтату бойынша Астаналық үдеріс болып табылады.
Астанада Сирияаралық реттеу мәселесіне қатысты бес кездесу өтті. Келіссөздердің негізгі нәтижелерінің бірі – төртінші кезең барысында қауіпсіздік аймақтарын құру жөніндегі Меморандумға қол жеткізу еді. Бұл аймақтардың ішінде қаруды пайдалануға тыйым салынып, гуманитарлық ұйымдардың жұмысы қамтамасыз етіледі.
Астаналық үдеріс өзінің параметрлері бойынша Женевалық келіссөздерден де тиімді болды. Және де бұл келіссөздер жалғасады, себебі кепіл беруші мемлекеттер де, Сирия үкіметі де келіссөздердің жалғасуына мүдделі.
Біздің мемлекетіміздің халықаралық күн тәртібінде тұрған күрделі міндеттерді шешуге қатысуда үлкен тәжірибесі бар. Қауіпсіздік Кеңесіндегі өзінің мүшелігін Қазақстан, тіпті, мейлі, қақтығуысшы тараптарды бір келіссөздер үстеліне отырғызу талпынысы ғана болса да, өзінің бейбіт бастамаларын жүзеге асыру үшін пайдаланады.
БҰҰ-ның Қауіпсіздік Кеңесіне мүшелігі – Қазақстан дипломаттарының маңызды жетістіктерінің бірі. Әрине, БҰҰ-ның Қауіпсіздік Кеңесіне мүше болу, бұл – елдің халықаралық аренада беделін арттыруға бағытталған жоба. БҰҰ-ның Қауіпсіздік Кеңесіне тұрақты емес мүшелігі стратегиялық қадам. Сондай-ақ, ол – Қазақстанға ұлттық мүдделерді ескере отырып жаһандық саяси міндеттерді шешуге тең құқылы қатысу, халықаралық назарды біздің аймақтың мәселелеріне аударуға, маңызды халықаралық ақпараттарға қол жеткізуге мүмкіндік береді. БҰҰ-ның Қауіпсіздік Кеңесіне тұрақты емес мүше болуы елдің экономикасына да игілікті әсерін тигізеді. Өйткені елге инвестициялардың ағымын ұлғайтады, серіктестерімен сауда қатынасын күшейтеді. Қазақстанның мұндай мәртебесі шетелдегі қазақстандықтардың мүдделерін қорғауға да септігін тигізеді.
Жалпы алғанда, Қазақстан Біріккен Ұлттар Ұйымының қызметінің барлық түрлеріне белсенді қатысуды жалғастыруда. Елбасымыз Нұрсұлтан Назарбаев атап өткендей, Қазақстанның БҰҰ-ның Қауіпсіздік Кеңесіне мүшелігі барлық әлемдік қоғамдастық мүшелері алдындағы үлкен жауапкершілік ретінде қарастырылады.
Осылайша Қазақстан аймақтық және жаһандық қауіпсіздікті нығайтуға БҰҰ және барлық әлемдік қоғамдастықпен танылған шынайы және сындарлы үлес қосып отырғандығын толығымен айта аламыз.
Құралай БАЙЗАҚОВА,
әл-Фараби атындағы ҚазҰУ жанындағы Қауіпсіздік және ынтымақтастық мәселелері институтының директоры