Биылғы сайыс Азиядағы өзара іс-қимыл және сенім шаралары жөніндегі кеңестің (АӨСШК) 25 жылдығына орай өткізілді. Осы жылдың 22 мамырында атаулы датаны халықаралық марафонмен бірге атап өту қажет деген шешім шығарылып, Қазақстан Республикасының Мәдениет және спорт министрлігі, Қазақстан Республикасының Жеңіл атлетика федерациясы мен Қытайдың «Шанхэ» Юньнань мәдениет және спорт компаниясы ШЫҰ мен АӨСШК халықаралық Астана марафонын өткізу туралы келісімге келген еді. Мұндағы басты мақсат – ұзақ мерзімді, тиімді қарым-қатынас орнату.
Астанадағы халықаралық марафонға әлемнің 20 елінен алты мыңға жуық спортшы қатысты. Оның ішінде ШЫҰ-ға мүше әрбір мемлекеттен жалпы саны 50 кәсіби спортшы тартылды.
Таң ата басталған марафонды Мәдениет және спорт министрі Арыстанбек Мұхамедиұлы ашып, қатысушыларға сәттілік тілеген соң, спортшылар кезек-кезегімен жүгіруді бастады. Марафоншылар үш қашықтыққа, яғни ЭКСПО-2017 көрмесінің құрметіне орай 2017 метрге, 10 шақырымға және 42 шақырым 195 метрге жүгірді. Желаяқтар жарысында еліміздің жоғары шенді тұлғалары да өз бақтарын сынады. Атап айтар болсақ, Қазақстан Республикасы Президенті Әкімшілігінің Басшысы Әділбек Жақсыбеков, Ұлттық қауіпсіздік комитетінің төрағасы Кәрім Мәсімов, Мәдениет және спорт министрі Арыстанбек Мұхамедиұлы, Ақпарат және коммуникациялар министрі Дәурен Абаев және Қазақстан Даму банкі басқармасының төрағасы Болат Жәмішев марафон жүгіруге тілек білдірді. Сондай-ақ, еліміздің Олимпиада чемпиондары мен жүлдегерлері де марафонға қатысып, спортшыларға қолдау көрсетті.
Ел тарихындағы тұңғыш кәсіби марафон жарысының қорытындысы бойынша 42 шақырымды құрайтын ең ұзақ қашықтықта өзбекстандық спортшы Андрей Петров пен белоруссиялық жүйрік Владислав Прямов мәре сызығын бір уақытта кесіп өткен. Нәтижесінде, төрешілер ақылдаса келе бірінші орынды өзбек спортшысына берді. Үздік үштікті қырғызстандық Илья Тяпкин қорытындылады. Жеңімпазға 13 мың АҚШ доллары, екінші орынға 6 мың долар және үшінші орынға 4 мың доллар сыйақы берілді.
Сондай-ақ марафонның 10 шақырымдық сайысында ерлер арасында бірінші орынды елордалық Құдайберген Зейноллаев, екінші орынды Алматы облысынан келген Дарын Қонысбаев иеленді. Жүлделі үшінші орынға ОҚО-ның желаяғы Артем Чижевский қол жеткізді. Қыздар арасындағы сайыста Татьяна Нерознак топ жарды. Күміс жүлде Шымкенттен келген Балнұр Асылбектің еншісіне бұйырса, үшінші орынды көкшетаулық Надежда Бекмағамбетова иеленді.
Сонымен қатар, ЭКСПО-2017 шарасына орай ұйымдастырылған 2017 метр қашықтықтың ерлер арасындағы сайысында астаналық студент Әлімжан Сейдешов жеңімпаз атанды. Тағы бір астаналық Әділбек Серікбек екінші орыннан көрінсе, қола жүлде семейлік Евгений Орхиповқа бұйырды. Әйелдер арасындағы жарыста астаналық Анар Қырықбаева бас жүлдені жеңіп алса, екінші және үшінші орынды Павлодардан келген екі марафоншы – Анастасия Шараварова мен Белла Комарова өзара бөлісті.
Марафон соңы қазақ эстрада өнерпаздарының концерттік бағдарламасымен жалғасты.
Әли БИТӨРЕ,
«Егемен Қазақстан»
Суреттерді түсірген
Ерлан ОМАР,
«Егемен Қазақстан»