Облыстық әкімдікте өткен ресми кездесу өңір экономикасының басым бағыттары мен Талдықорған қаласын дамытудың бас жоспарымен танысудан басталды. Ресми делегацияға облыс аумағында жүзеге асырылып жатқан агроөнеркәсіптік кешенді дамыту, индустрияландыру, инвестиция тарту көрсеткіштері және өңірдің даму бағыты жайлы жан-жақты ақпарат берілді. Соңғы уақыттарда атқарылған жұмыстар мен жеткен жетістіктердің көрсеткіші жаңа әріптестік қарым-қатынастарға негіз салмақ. Осыған дейін қол жеткізген келісімдердің нәтижесі де мәмілеге әсер етпей тұрмайды. Инвестиция тарту, шетелдік компаниялармен әріптестікті нығайту бүгінде ел экономикасының бір тірегі есептеледі. Сол себепті, Татарстан елі басшысының бұл сапары алдағы уақыттағы тың жобаларға жол ашары сөзсіз.
Бұл сапардың ұйытқысы болған біздің тарап екенін айта кеткен жөн. Ресми делегациямен салтанатты таныстықтан соң, облыс әкімі Амандық Баталов сөз сөйлеп, шақыртуды қабыл алғаны үшін Татарстан Республикасының Президенті Рустам Миннихановқа алғыс білдірді. Кездесудің мақсаты мен облыс экономикасының негізгі бағыттарына тоқталды.
– Біз сіздерден өнеркәсіпті дамыту, жаңа технологияларды енгізу тұрғысындағы тәжірибелеріңізді өзімізде қолданғымыз келеді. Қант қызылшасын өсіруді жаңғырту – Жетісу өлкесі үшін басым бағыттардың бірі болғандықтан, бұл салада жұмыла жұмыс жүргізудеміз. Сол себепті сіздердің осы бағыттағы тәжірибелеріңіз бен технологияларыңыз бізді қызықтыратындығы анық. Сондай-ақ, Мемлекет басшысы Нұрсұлтан Әбішұлы Назарбаевтың тапсырмасы бойынша құрылған «Қорғас – Шығыс қақпасы» арнайы экономикалық аймағы мен «Қорғас» шекара маңы ынтымақтастығының Халықаралық орталығы (ШЫХО) арқылы «Құрғақ порт» трансұлттық жобасының мүмкіншіліктеріне негізделіп, Татарстан мен Алматы облысының кәсіпкерлері арасында әріптестіктің тығыз байланысын орнатқан жөн. Тағы бір атап өтуге тұрарлық мәселе – біздің өңірімізде барлық қажетті инфрақұрылымы жүргізілген индустриялды аймақтар бар. Бұл да бизнесті дамыту мен инвестиция тартуға септігін тигізер игі ісіміз, – деді әкім.
Ал Татарстан Президенті екі арадағы әріптестікке мүдделі екенін айта келіп, жаңа қарым-қатынастарға жол ашатын осы кездесуді ұйымдастырып, шақыру ұсынғаны үшін өңір басшысына ризашылығын жеткізді. Екіжақты тығыз қарым-қатынас орнатудың негізгі тетіктерін сөз қылды. Бұл сапарында көзделген келісімдердің татар тарапы үшін де аса маңызды екенін ескертті.
– Біз «Қорғас» ШЫХО мен «Қорғас – Шығыс қақпасы» АЭА мүмкіндіктерімен танысуға үлкен қызығушылық білдіріп отырмыз. Біз үшін еркін экономикалық аймақтың жұмысымен танысу, қандай бағыттар бойынша бірлесіп жұмыстар жүргізуге болатындығын анықтау, отандық өнімдерімізді Қазақстан аумағы арқылы өзге мемлекеттерге өткізу мүмкіндіктерін қарастыру маңызды болып тұр. Сонымен қатар, Алматы облысында мемлекет-жекеменшік әріптестік негізінде көптеген балабақшалардың ашылып жатқандығына ерекше тоқталғым келеді. Бұл тәжірибелеріңіз жаңалық болды. Қызықтырды. Одан бөлек, Жетісу өңірі майбұршақ пен жүгері өндіру бойынша алдыңғы қатарда екендігін ескерсек, біз үшін осы өнімдерді өсірудегі сіздердің тәжірибелеріңіз қажет. Жалпы, Татарстан мен Алматы облысы арасында ауылшаруашылығы бағытында жолдары қиылысар тұстардың өте көп екендігін және оны қос тарапқа да тиімді пайдалануға болатындығын байқадым, – деді Рустам Минниханов.
Сөзінің соңында жетісу жерінің көркемдігін, шаруашылыққа ыңғайлы табиғи-климаттық жағдайын атап өтті. Мұндай басымдықтар мен артықшылықтар кім-кіммен де бәсекеге қорықпай түсуге және кім-кімге де сенімді серіктес бола алатынын айта келіп, қандай келісімге келсе де, екі жақ үшін де тиімділікке бастарына сенім білдірді.
Татар ұлтының, Татарстан Республикасының басшысы келіп жатқанда, еліміздегі татар диаспорасы бұл кездесуден қалыс қала қоймасы анық. Әкімдіктегі өзара тиімді ынтымақтастық мүмкіндіктерін талқылағаннан кейін, қос тарап кездесуді Тіл сарайында жалғастырды. Мәртебелі меймандар Алматы облысының татар этномәдени орталығының өкілдерімен кездесіп, көзайым болды деуге болады. Тіл сарайындағы жиында Татарстан Президенті облыс әкіміне Әріп Тәңірберген жазып қалдырған «Біржан Сал мен Ақын Сара айтысы» атты қолжазбаның көшірмесін табыстады.
Қонақтардың бұдан арғы сапары негізгі діттеген мақсат бойынша Панфилов ауданында жалғасты. «Қорғас – Шығыс қақпасы» арнайы экономикалық аймағы мен «Қорғас» шекара маңы ынтымақтастығының Халықаралық орталығымен танысып, алыс-беріс, барыс-келіс жүретін аймақтың тыныс-тіршілігіне, артықшылықтарына қанығып қайтты.
Алмас НҮСІП,
«Егемен Қазақстан»
Алматы облысы
Суретті түсірген
Жұмабай Мұсабеков
