Сенат спикері өз сөзінде Пагуош конференциясы ашылған сәтінен бастап өзінің ғылыми идеяларымен, ядролық қарудан азат әлем құру мәселелері жөніндегі аса мазмұнды және сындарлы пікірсайыстарымен танымал екенін атап өтті. Төраға түрлі мемлекеттердегі азаматтардың, оның ішінде жастардың арасында қарусыздану идеяларын кеңінен таратуда Пагуош қозғалысының рөлін жоғары бағалады.
«Бұл форумды біздің елде өткізуге сенім білдірілгені жайдан-жай емес, – деді Қ.Тоқаев. – Бүгін халықаралық қоғамдастық Ядролық сынақтарға қарсы іс-қимылдың халықаралық күнін атап өтуде. Біздің Пагуош қозғалысымен жемісті үнқатысуымыз жалғасын табатынына сенімдімін».
Төраға, сондай-ақ, ядролық қаруға қарсы халықаралық қозғалысқа Қазақстанның жаңаша серпін бергеніне де тоқталып өтті. «26 жыл бұрын дәл осы күні Президент Нұрсұлтан Назарбаевтың тарихи Жарлығына сәйкес Семей ядролық полигоны жабылған болатын. Ол қаруды таратпау және қарусыздану саласындағы жаһандық күш-жігерде басты рөл атқарады», – деді Қ.Тоқаев.
Сөзін аяқтай келіп Қ. Тоқаев Қазақстан Республикасы бейбітшілік пен қауіпсіздікті нығайту үшін Пагуош қозғалысымен нәтижелі байланыстарды жалғастыра беретініне сенім білдірді.
Әлисұлтан ҚҰЛАНБАЙ,
«Егемен Қазақстан»
